ពលករចំណាកស្រុកកម្ពុជាជាង១៦ម៉ឺននាក់នៅក្នុងប្រទេសថៃ

ពលករចំណាកស្រុកកម្ពុជាជាង១៦ម៉ឺននាក់នៅក្នុងប្រទេសថៃ ត្រូវប្រឈមនឹងការនិរទេស បើសិនមិនបានទៅចុះឈ្មោះក្នុងកិច្ចដំណើរការផ្ទៀតផ្ទាត់ជាតិ សាសន៍ មុនថ្ងៃកំណត់ថ្ងៃសុក្រសប្តាហ៍នេះទេ។ នេះបើយោងតាមប្រព័ន្ធផ្សព្វផ្សាយរដ្ឋរបស់ថៃរាយការណ៍កាលពី ម្សិលមិញ។
ប្រព័ន្ធផ្សព្វផ្សាយថៃ MCOT បានស្រង់សម្តីមន្រ្តីថា មានពលករចំណាកស្រុកកម្ពុជាតែ ៥៦ ៧៧៦ នាក់ បានបំពេញចប់សព្វគ្រប់នូវកិច្ចដំណើរការផ្ទៀងផ្ទាត់ជាតិសាសន៍ នៅសល់ពលករកម្ពុជាប្រមាណ១៦៥ ៦៥៤នាក់ទៀត បូកនឹងពលករចំណាកស្រុកជាង១លាននាក់មកពីប្រទេសដទៃទៀត ដែលអាចទទួលរងការចាប់ខ្លួន ការនិរទេស និងការកេងប្រវ័ញ្ច ការជំរិតទារប្រាក់ និងទាសករបំណុល។ នេះបើតាមអ្នកជំនាញនិងសង្គមស៊ីវិល។