កម្មការិនី​រោង​ចក្រ​ Cambo Kotop ធ្វើ​កូដកម្ម​ដុត​កង់​ឡាន - Strike at the Cambo Kotop factory

Tuesday, 02 October 2012
លាង ផាន់ណារ៉ា
The Phnom Penh Post

ភ្នំពេញៈ បន្ទាប់​ពី​មិន​ទាន់​មាន​ដំណោះ​ស្រាយ​សមរម្យ​ណា​មួយ នៅ​ព្រឹក​ថ្ងៃ​អង្គារ​នេះ កម្មករ កម្មកា​រិនី​រោង​ចក្រ​កាត់​ដេរ Cambo Kotop ប្រហែល​៨០០​នាក់​បាន​បន្ត​ធ្វើ​កូដកម្ម និង​បាន​ដុត​កង់​ឡាន មុខ​រោង​ចក្រ​ដែល​ស្ថិត នៅ​ខណ្ឌ​​ពោធិ៍​សែន​ជ័យ​ក្នុង​​រាជធានី​ភ្នំពេញ។

កម្មការិនី​ម្នាក់​បាន​បញ្ជាក់​ថា​កម្មករ​ធ្វើ​កូដកម្ម​នេះ ដើម្បី​​​ទាម​ទារ​ឲ្យ​រោង​ចក្រ​ផ្តល់​ អាហារ​​ថ្ងៃ​ត្រង់ ​ប្រាក់​រង្វាន់​ធ្វើការទៀង​ទាត់​១៥​ដុល្លារ ​ប្រាក់​បន្ថែម​ម៉ោង​​ចាប់​ពី​ម៉ោង​៤​ដល់​ម៉ោង​៦​ល្ងាច​ចំនួន​៣០០០​​រៀល ប្រាក់​ខែ​គោល​៧៥​ដុល្លារ​ក្នុង​មួយ​ខែ ​ប្រាក់​​ធ្វើ​ដំណើរ​១០​ដុល្លារ និង​ប្រាក់​ទ្រទ្រង់​សុខ​ភាព​ជាង​​៥​ដុល្លារ​ក្នុង​មួយ​ខែ។

សូមបញ្ជាក់ថា កាល​ពី​ម្សិល​មិញ​ កម្មករ​ Cambo Kotop ប្រហែល​៨០០​នាក់នេះដែរ ​​បាន​ជួបជុំ​គ្នា​ដើរ​ដង្ហែរ​ពី​រោង​ចក្រ​ទៅ​កាន់​ក្រសួង​ការងារ​​ដើម្បី​ស្នើសុំ​អន្តរាគមន៍​តាម​ការ​ទាម​ទាររបស់​ពួកគេ​ចំនួន​៨​ចំនុច។