Can the CPP still tackle the fire blaze? |
ថ្ងៃទី 11 កញ្ញា 2012
រដ្ឋាភិបាល និងគណបក្សកាន់អំណាចវិញ ត្រូវតែរកផ្លិតយក្សមួយមកបក់ពន្លត់អគ្គីភ័យមួយនេះ អោយទាន់ពេលវេលា មុនពេលដែលវាមកបំផ្លាញអំណាចរបស់ពួកគេ។
ករណីរបស់លោក ម៉ម សូណង់ដូ បានរំលេចចេញព្រំដែនដ៏ស្រពេចស្រពិលមួយរវាងជម្លោះដីធ្លី និងបញ្ហានយោបាយនៅក្នុងប្រទេស ដែលមានប្រជាជនជាង ១៤លាននាក់នេះ។ ការកាត់ទោសលោកនៅថ្ងៃនេះ ត្រូវប្រឈមនឹងការតវ៉ាពីអ្នកគាំទ្ររបស់លោកដែលគិតថា លោកស្អាតស្អំ និងមានការពាក់ព័ន្ធណាមួយនឹងការធ្វើអបគមន៍ដូចដែលមានការចោទប្រកាន់ឡើយ។ ក្នុងចំណោមអ្នកគាំទ្រទាំងនោះ ក៏ឃើញមានអ្នកនយោបាយមកពីខាងក្រុមប្រឆាំងផងដែរពោល គឺមកពីគណបក្សសមរង្ស៊ី និងគណបក្សសិទ្ធិមនុស្ស។ វត្តមានរបស់ពួកគេនៅក្នុងចំណោមអ្នកគាំទ្ររបស់លោក ម៉ម សូណង់ដូ បានធ្វើឲ្យលេចចេញការពិតមួយដែលថា ជម្លោះដីធ្លីនៅក្នុងប្រទេសកម្ពុជាក៏នឹងក្លាយជាជម្លោះនយោបាយដ៏ស្រួចស្រាវមួយផងដែរ នៅក្នុងដំណើរឆ្ពោះទៅរកការបោះឆ្នោតនាឆ្នាំ២០១៣។
សម្រាប់គណបក្សប្រឆាំង គឺគណបក្សសិទ្ធិមនុស្ស និងគណបក្សសមរង្ស៊ី ដែលនឹងច្របាច់បញ្ចូលគ្នានោះ ជម្លោះដីធ្លីកាន់តែបង្ហូរឈាម ពួកគេនឹងកាន់តែទទួលបានផលប្រយោជន៍អំពីភាពវឹកវរនោះ ហើយប្រាកដណាស់ពួកគេនឹងប្រឹងប្រែងបោកបក់ភ្លើងជម្លោះនេះអោយឆាបឆេះកាន់តែសន្ធោរសន្ធៅ។ នេះជាអ្វីដែលក្រុមប្រឆាំងនៅក្នុងពិភពលោកតែងតែធ្វើ ដើម្បីស្វែងរកការគាំទ្រ និងបញ្ជាក់អីសមត្ថភាពរបស់គណបក្សកាន់អំណាច។
រដ្ឋាភិបាល និងគណបក្សកាន់អំណាចវិញ ត្រូវតែរកផ្លិតយក្សមួយមកបក់ពន្លត់អគ្គីភ័យមួយនេះ អោយទាន់ពេលវេលា មុនពេលដែលវាមកបំផ្លាញអំណាចរបស់ពួកគេ។
ចំណែកប្រជាជន គឺស្ថិតនៅក្នុងកម្លាំងប្រទាញប្រទង់ពីរផ្ទុយគ្នានេះហើយ ពេលខ្លះក៏ក្លាយជាជនរងគ្រោះ នៃសង្គ្រាមរបស់អ្នកនយោបាយ។
ខណៈដែលការបោះឆ្នោតឆ្នាំ២០១៣ បានខិតជិតមកដល់នោះ រាល់ជម្លោះនយោបាយមិនត្រូវធ្វើយ៉ាងណាឲ្យក្លាយជាអគ្គីភ័យដ៏សាហាវមួយ ដែលដុតបំផ្លាញសេចក្តីសុខរបស់ប្រជាជនកម្ពុជាឡើយ។
ការប្រកួតប្រជែងត្រូវធ្វើឡើងដោយសុច្ចរិតភាពបំផុត ហើយទុកឲ្យប្រជាជនធ្វើការសម្រេចចិត្តមួយជាមួយនឹងលំហូរព័ត៌មាន ដ៏គ្រប់គ្រាន់និងគួរជាទីទុកចិត្ត។ ការសម្រេចគោលដៅនយោបាយ ដោយការលះបង់សេចក្តីសុខរបស់ប្រជាជននឹងក្លាយជាកំហុសឆ្គងមួយ ដែលសមនឹងត្រូវប្រវត្តិសាស្ត្រចងចាំ៕
0 comments:
Post a Comment