ប៉ូលិសបិទផ្លូវចេញចូលតុលាការសាលាដំបូងរាជធានីភ្នំពេញ ខាងជើងស្តាតអូឡាំពិក ក្នុងពេលតុលាការ បើកសវនាការ កាត់ទោសលោកម៉មសូណង់ដូ នាព្រឹកថ្ងៃទី១១ ខែកញ្ញា ឆ្នាំ២០១២ ( រូបថត៖ ស៊ីវ ចាន់ណា ) |
ថ្ងៃទី 11 កញ្ញា 2012
ភ្នំពេញ: ប៉ូលិសបានពង្រាយកម្លាំង ដាក់របាំងបិទផ្លូវនៅមុខសាលាដំបូងរាជធានីភ្នំពេញ នៅពេលដែលតុលាការនេះ បានបើកសវនាការកាត់ទោសលោក ម៉ម សូណង់ដូ ប្រធានសមាគមអ្នកប្រជាធិបតេយ្យ និងជានាយកវិទ្យុសំបុកឃ្មុំ នៅព្រឹកថ្ងៃទី១១ ខែកញ្ញា ឆ្នាំ២០១២។
ក្នុងពេលបិទផ្លូវនោះ សូម្បីតែអ្នកកាសែត និងសកម្មជនសិទ្ធិមនុស្ស ក៏មិនត្រូវបានអនុញ្ញាតឲ្យចូលទៅក្នុងតុលាការ ដើម្បីយកព័ត៌មាន និងតាមដានសវនាការឡើយ។
លោក ម៉ម សូណង់ដូ ប្រធានសមាគមអ្នកប្រជាធិបតេយ្យ និងជានាយកវិទ្យុសំបុកឃ្មុំ ត្រូវបានចាប់ខ្លួនកាលពីថ្ងៃទី១៥ ខែកក្កដា ឆ្នាំ២០១២។ លោក ម៉ម សូណង់ដូ ជាប់ចោទក្នុងរឿងជម្លោះដីធ្លី បង្កើតតំបន់អបគមន៍នៅខេត្តក្រចេះ។លោកមេធាវី សុក សំអឿន មេធាវីការពារក្តីលោក ម៉ម សូណង់ដូ បានលើកឡើងថា តាមបទចោទប្រកាន់ ក្នុង ៤ ករណី ពាក់ព័ន្ធនឹងជម្លោះដីធ្លីនៅភូមិប្រម៉ា ឃុំកំពង់ដំរី ស្រុកឆ្លូង ខេត្តក្រចេះ ដែលរដ្ឋាភិបាលចោទថា ពលរដ្ឋដែលជាតំណាងរបស់សមាគមអ្នកប្រជាធិបតេយ្យបង្កើតតំបន់អបគមន៍នោះ គឺលោក ម៉ម សូណង់ដូ ត្រូវប្រឈមនឹងការជាប់ពន្ធនាគារសរុបដល់ទៅ ៣០ឆ្នាំ។
មានអាយុ ៧២ឆ្នាំ លោក ម៉ម សូណង់ដូ ប្រធានសមាគមអ្នកប្រជាធិបតេយ្យ និងជានាយកវិទ្យុសំបុកឃ្មុំ ត្រូវបានប៉ូលិសចាប់ខ្លួនកាលពីថ្ងៃទី១៥ ខែកក្កដា ឆ្នាំ២០១២ ក្រោមបទចោទប្រកាន់ ៤ ករណី ពាក់ព័ន្ធនឹងការនៅពីក្រោយហេតុការណ៍ ដែលរដ្ឋាភិបាលបានចោទប្រកាន់ក្រុមអ្នកភូមិ ដែលជាសាខាសមាគមអ្នកប្រជាធិបតេយ្យ នៅភូមិប្រម៉ា ឃុំកំពង់ដំរី ស្រុកឆ្លូង ខេត្តក្រចេះ ថាបានចាប់ដីខុសច្បាប់ និងបង្កើតតំបន់អបគមន៍។
ក៏ប៉ុន្តែលោក ម៉ម សូណង់ដូ និងសាខាប្រធានសមាគមអ្នកប្រជាធិបតេយ្យនៅខេត្តក្រចេះ ឈ្មោះ ប៊ុន រដ្ឋា ដែលជាប់ចោទ និងបានរត់គេចខ្លួន បានបដិសេធរាល់ការចោទប្រកាន់៕
0 comments:
Post a Comment