Print 
PDF
By Borosrath 18/09/12:
ស្ថានភាពទឹកជំនន់ពីឆ្នាំមុននៅខេត្តព្រៃវែង។ រូបថត ស្រេង ម៉េងស្រ៊ុន
លោក សួង មួន មេឃុំអូរបីជាន់ ស្រុកអូរជ្រៅ កាលពីថ្ងៃចន្ទបានប្រាប់ឲ្យដឹងថា ជំនន់ទឹកភ្លៀងបានហូរធ្លាក់មកពីខេត្តស្រះកែវ ប្រទេសថៃ ហើយបានប៉ះពាល់ភូមិចំនួន៦ និងបានជន់លិចផ្លូវថ្នល់ប្រវែង៥៤៧៨ម៉ែត្រ លិចស្រូវជាង៤ពាន់ហិកតា ដំឡូងមីជាង១០០ហិកតា។ ជាមួយនោះពលរដ្ឋចំនួន៧ គ្រួសារត្រូវបានជម្លៀសទៅកាន់ទីទួលសុវត្ថិភាព។
លោកមេឃុំ បញ្ជាក់ថា៖ «ទឹកភ្លៀងហូរធ្លាក់មកពីខាងថៃ តាំងពីចុងសប្តាហ៍មុន ធ្វើឲ្យលិចលង់អស់៦ភូមិហើយ។ ទឹកលិចដល់រនាបផ្ទះ តែពលរដ្ឋភាគច្រើនមិនទាន់ជម្លៀសទៅទីទួលសុវត្ថិភាពនៅឡើយ។ ស្រូវមិនទាន់ខូចទេ ប៉ុន្តែ ដំឡូងមីជាង១០០ហិកតា បានខូចអស់ហើយ»។
លោកថា ការខូចខាតនឹងកើនឡើងទៀត បើទឹកនៅតែបន្តហូរមកពីប្រទេសថៃឥតឈប់នោះ។
លោក អ៊ុក កែវរតនៈ អ្នកនាំពាក្យសាលាខេត្តបន្ទាយមានជ័យបានឲ្យដឹងថា ភ្លៀងទាំងនៅដីខ្មែរនិងដីថៃ តាំងពីចុងសប្តាហ៍មុន ហើយទឹកធ្លាក់មកពីថៃ ជាជំនន់ទឹកភ្លៀង។ លោកបន្តថា ៖ «វាជាជំនន់ទឹកភ្លៀងហូរមកពីថៃ ហើយខាងថៃនៅមិនទាន់បើកទ្វាររំដោះទឹកទេ។ បើបើកគេនឹងប្រាប់យើងជាមុន»។
ភ្លៀងនឹងនៅតែបន្តធ្លាក់ពេញ មួយសប្តាហ៍ទៀត ដែលអាចបណ្តាលឲ្យខេត្ត១៤ នៅប្រទេសកម្ពុជារងនូវជំនន់ទឹកភ្លៀង បន្ទាប់ពីជ្រលងសម្ពាធទាបបាននាំទឹកភ្លៀងមកធ្លាក់នៅប្រទេស កម្ពុជា អស់ជាង២សប្តាហ៍មកហើយ។
តាមសេចក្តីជូនដំណឹងរបស់ ក្រសួង ធនធានទឹកនិងឧតុនិយមពីថ្ងៃចន្ទថា ប្រព័ន្ធសម្ពាធទាបមួយបានអូសកាត់និងមានឥទ្ធិពលមកលើប្រទេស កម្ពុជា អស់រយៈពេលជាង២សបា្តហ៍ហើយ ហើយស្ថានភាពបែបនេះ នឹងបន្តកើតមាននៅកម្ពុជា ក្នុងរយៈពេលមួយសប្តាហ៍បន្តទៀត ដោយបង្កឲ្យមានភ្លៀងធ្លាក់ខ្លាំងរហូតដល់ថ្ងៃទី២៣ ខែកញ្ញានេះនឹងអាចបណ្តាលឲ្យមានជំនន់ទឹកភ្លៀង នៅខេត្តឧត្តរមានជ័យ ព្រះវិហារ បន្ទាយមានជ័យ បាត់ដំបង ពោធិ៍សាត់ កំពង់ឆ្នាំង សៀមរាប កំពង់ធំ កំពង់ស្ពឺ តាកែវ កណ្តាល ព្រៃវែង ស្វាយរៀង និងខេត្តកំពត។
សេចក្តីជូនដំណឹងដដែលក៏បានអំពាវនាវឲ្យ ៖ «ក្រសួង ស្ថាប័នពាក់ព័ន្ធ អាជ្ញាធរដែនដី និងប្រជាពលរដ្ឋដែលរស់នៅតាមបណ្តាខេត្តខាងលើ ពិសេសតំបន់ជាប់នឹងដងស្ទឹង សូមបង្កើនការប្រុងប្រយ័ត្នខ្ពស់ ដើម្បីចៀសវាងនូវគ្រោះថ្នាក់ និងការប៉ះពាល់ដល់ទ្រព្យសម្បត្តិផ្សេងៗ»។
លោក ហាក់ ពុទ្ធី ប្រធានស្តីទីមន្ទីរធនធានទឹកនិងឧតុនិយមខេត្តកំពង់ធំ បានប្រាប់ថា ភ្លៀងនៅតែបន្តធ្លាក់ជាប់រហូតហើយកម្ពស់ទឹកស្ទឹងសែន បានកើនពី ១៣,១២ម៉ែត្រ នៅថ្ងៃអាទិត្យ ដល់១៣,១៥ម៉ែត្រនៅថ្ងៃចន្ទ។ លោកបញ្ជាក់ថា៖ «ប៉ុន្តែ វាមិនទាន់ដល់១៣,៦០ម៉ែត្រ ដែលជាចំណុចប្រកាសអាសន្នទេ ហើយមិនទាន់បង្កជាគ្រោះមហន្តរាយដែរ»។
ទោះជាយ៉ាង ណា លោក កែវ វី អ្នកនាំពាក្យ គណៈកម្មាធិការជាតិគ្រប់គ្រងគ្រោះមហន្តរាយ បានអះអាងពីម្សិលមិញថា ស្ថានភាពទឹកជំនន់ នៅក្នុងស្រុកអូរជ្រៅ ខេត្តបន្ទាយមានជ័យនៅមិនទាន់ស្ថិតក្នុងភាពធ្ងន់ធ្ងរនៅឡើយទេ ហើយអាជ្ញាធរគ្រប់លំដាប់ថ្នាក់ បានត្រៀមលក្ខណៈទប់ទល់រួចរាល់ហើយ។
លោក កែវ វី មានប្រសាសន៍បន្តថា ៖ «ជាទូទៅវាមិនទាន់មានសភាពធ្ងន់ធ្ងរនៅឡើយ តែយើងប្រុងជាប់ជានិច្ចក្រែងលោជំនន់ទឹកភ្លៀងឡើងកាន់តែខ្លាំង »។
លោក បន្ថែមថា ខេត្តកំពង់ធំអាចប្រឈមនឹងការជន់លិចនៅពេលខាងមុខ ព្រោះទឹកភ្លៀងបាននឹងកំពុងហូរធ្លាក់មកពីខេត្តព្រះវិហារ តាមដងស្ទឹងសែន ឆ្ពោះមកកាន់ខេត្តនេះយ៉ាងគំហុក៕
0 comments:
Post a Comment