ស្តេចកំជិល និងជើងបាញ់បោះនៅតាកែវ ... ចាំមើលគេដាក់ទោសបែបណាដែរ?

ប្រភពពីប្រជាពលរដ្ឋខេត្តតាកែវ បានឲ្យដឹងថា កាលពីម៉ោងប្រមាណ១១យប់ ថ្ងៃចន្ទ ទី៣ ខែកញ្ញា ឆ្នាំ២០១២ ក្រុមអាជ្ញាធរខេត្តតាកែវ មួយក្រុម ក្នុងនោះមានលោក ឡាយ វណ្ណៈ អភិបាលរងខេត្ត រួមទាំងមន្ត្រីតុលាការខេត្តខ្លះ បានចូលទៅច្រៀងលេងនៅហាងខារ៉ាអូខេឈ្មោះរស្មីអង្គរ។ ក្រោយមក មានផ្ទុះអាវុធ ធ្វើឲ្យម្ចាស់ហាងខារ៉ាអូខេនោះរបួសជើង។ ប្រភពដដែលអះអាងថា បន្ទាប់មកអភិបាលរងខេត្តតាកែវ លោក ឡាយ វណ្ណៈ បានដឹកជនរងគ្រោះឈ្មោះ មាស សុថន ជាម្ចាស់ហាងខារ៉ាអូខេរស្មីអង្គរ ទៅមន្ទីរពេទ្យ ហើយបានគម្រាមគ្រូពេទ្យមិនឲ្យបញ្ចេញព័ត៌មានបាញ់បោះនេះទៅស្ថាប័នណាបានដឹងឮឡើយ។ លោក អំ សំអាត បន្តថា រឿងហេតុដែលបណ្ដាលឲ្យផ្ទុះគ្រាប់នោះ គឺដោយសារក្រុមមន្ត្រីទាំងនោះ បានអួតកាំភ្លើងខ្លីដាក់គ្នានៅពេលបញ្ចូលគ្រាប់រួច ក៏ផ្ទុះត្រូវម្ចាស់ហាងខារ៉ាអូខេនោះទៅ។ លោកថា នៅក្នុងប្រទេសកម្ពុជា ករណីអ្នកធំ អ្នកមានអំណាច អ្នកមានលុយ ឲ្យតែបានប្រព្រឹត្តអំពើខុសច្បាប់ធ្ងន់ធ្ងរ គេតែងតែសង្កេតឃើញមានក្រុមជំនាញ ប្រើវិធីកាយកប់ត្រឡប់សាច់រឿងពីខុសទៅត្រូវ ដោយគេយកមនុស្សផ្សេងមកទទួលកំហុសជំនួសអ្នកប្រព្រឹត្តជាដើម។