អ្នកស្រី ទេព វន្នី ដឹកនាំបាតុកម្មទាមទារឲ្យដោះលែងអ្នកបឹងកក់ ឈ្មោះ យ៉ោម បុប្ផា ពីគុកព្រៃស នៅថ្ងៃទី១០ ខែកញ្ញា ឆ្នាំ២០១២ នៅតំបន់បឹងកក់។ (RFA/Sok Serey) |
ប្រធានសមាគមរួមគ្នាដើម្បីអភិវឌ្ឍន៍កម្ពុជា លោក ឯ សិភាស់ ដឹកនាំបាតុកម្មនៅថ្ងៃទី១០ ខែកញ្ញា ទាមទារឲ្យបន្តឃុំអ្នកស្រី យ៉ោម បុប្ផា។ RFA/Sok Serey |
ក្រុមអ្នករត់ម៉ូតូឌុបបាតុកម្មប្រឆាំងក្រុមអ្នកបឹងកក់
នៅថ្ងៃទី១០ កញ្ញា នេះ នៅទីក្រុងភ្នំពេញ មានបាតុកម្មចំនួន ២ នៅថ្ងៃតែមួយ ផ្ដោតលើបញ្ហាតែមួយ ប៉ុន្តែគោលបំណងខុសគ្នាស្រឡះ។
2012-09-10
បាតុកម្មរបស់អ្នកបឹងកក់ ទាមទារសុំឲ្យតុលាការ និងក្រសួងយុត្តិធម៌ ដោះលែងអ្នកស្រី យ៉ោម បុប្ផា ឲ្យមានសេរីភាពចេញពីគុកព្រៃស។ ចំណែកឯបាតុកម្មមួយទៀតដែលមានអ្នករត់ម៉ូតូឌុបចូលរួមប្រមាណ ១០០នាក់ បានទាមទារសុំឲ្យតុលាការ និងក្រសួងយុត្តិធម៌ បន្តឃុំខ្លួនអ្នកស្រី យ៉ោម បុប្ផា នោះ នៅក្នុងគុកព្រៃសបន្តទៀត។
សកម្មជនទាមទារដីធ្លីនៅតំបន់បឹងកក់ អ្នកស្រី ទេព វន្នី នៅថ្ងៃទី១០ ខែកញ្ញា ឆ្នាំ២០១២ បានដឹកនាំបាតុកម្មអហិង្សាមួយមានមនុស្សចូលរួមចំនួនជាង ១០០នាក់ នៅតំបន់បឹងកក់នោះ ដើម្បីទាមទារឲ្យសាលាដំបូងរាជធានីភ្នំពេញ និងក្រសួងយុត្តិធម៌ ដោះលែងអ្នកស្រី យ៉ាម បុប្ផា អាយុ ៣១ឆ្នាំ ឲ្យមានសេរីភាពពីគុកព្រៃស។
បាតុកម្មនោះត្រូវបានរារាំងដោយកងកំលាំងប្រដាប់អាវុធរាប់សិបនាក់ មិនឲ្យដើរក្បួនដាក់ញត្តិទាមទារនោះទៅតុលាការ និងក្រសួងយុត្តិធម៌ទេ។
អ្នកភូមិបឹងកក់ ឈ្មោះអ្នកស្រី យ៉ោម បុប្ផា ត្រូវបាននគរបាលចាប់ខ្លួនកាលពីសប្ដាហ៍កន្លងទៅនេះ ហើយក្រោយមកត្រូវបានសាលាដំបូងរាជធានីភ្នំពេញ បានចោទប្រកាន់ក្រោមបទព្រហ្មទណ្ឌ បង្កហិង្សាដោយចេតនាតាមមាត្រាទី២១៨ នៃក្រមព្រហ្មទណ្ឌ។
អ្នកស្រី ទេព វន្នី បានមានប្រសាសន៍ប្រាប់អ្នកកាសែតដែលកំពុងហ៊ុមព័ទ្ធដោយកងកំលាំងប្រដាប់អាវុធថា អ្នកស្រី យ៉ោម បុប្ផា មិនបានប្រព្រឹត្តដូចការចោទប្រកាន់នោះទេ ប៉ុន្តែមន្ត្រីខិលខូចមួយចំនួនបានប្រើប្រាស់ក្រុមអ្នករត់ម៉ូតូឌុបប្រឆាំងការទាមទារដោះលែងនោះ។
អ្នកស្រី ទេព វន្នី៖ «ផ្ដល់ភាពយុត្តិធម៌ដល់អ្នកស្រី យ៉ោម បុប្ផា ឲ្យគាត់មកនៅក្រៅឃុំ ដើម្បីមកជួបជុំក្រុមគ្រួសារគាត់សិន ព្រោះអីគាត់មិនទាន់ក្លាយជាជនល្មើស ដូចតុលាការយកទៅដាក់ឃុំខ្លួន ឬមួយថា គាត់ប្រព្រឹត្តបទល្មើសហ្នឹងទេ»។
កាលពីសប្ដាហ៍កន្លងទៅនេះ អ្នកភូមិបឹងកក់ទាំងនោះបានដាក់ញត្តិជូនរដ្ឋមន្ត្រីទទួលបន្ទុកទីស្ដីការគណៈរដ្ឋមន្ត្រី លោក សុខ អាន ជាឧបនាយករដ្ឋមន្ត្រី សុំឲ្យជួយអន្តរាគមន៍ដោះលែងអ្នកស្រី យ៉ោម បុប្ផា នោះ។
ផ្ទុយពីការទាមទារនេះ ប្រធានសមាគមរួមគ្នាដើម្បីអភិវឌ្ឍន៍កម្ពុជា លោក ឯ សុភាស់ នៅថ្ងៃទី១០ ខែកញ្ញា នេះដែរ ក៏បានដឹកនាំក្រុមអ្នករត់ម៉ូតូឌុបចំនួន ១០០នាក់ នៅទីលានប្រជាធិបតេយ្យ និងនៅមុខសាលាដំបូងរាជធានីភ្នំពេញ ដើម្បីទាមទារឲ្យតុលាការ និងក្រសួងយុត្តិធម៌បន្តឃុំខ្លួនអ្នកស្រី យ៉ោម បុប្ផា នោះបន្តទៀត ដោយបានចោទថា អ្នកស្រី យ៉ោម បុប្ផា និងស្វាមី បានបង្កហិង្សា និងរបួសស្នាមមកលើឈ្មោះ វ៉ាត ថៃសេង អាយុ ២៤ឆ្នាំ និងឈ្មោះ ង៉ែត ចិត្ត អាយុ ២៨ឆ្នាំ កាលពីថ្ងៃទី៧ ខែសីហា កន្លងទៅនេះ។
លោក ឯ សុភាស់ បានដាក់ញត្តិនោះជូនសាលាដំបូងរាជធានីភ្នំពេញ ដោយជោគជ័យ នៅថ្ងៃទី១០ ខែកញ្ញា។ លោកបានមានប្រសាសន៍ប្រាប់វិទ្យុអាស៊ីសេរី នៅមុខតុលាការថា លោកសុំឲ្យតុលាការផ្ដន្ទាទោសអ្នកស្រី យ៉ោម បុប្ផា ឲ្យបានឆាប់៖ «តុលាការនឹងវិនិច្ឆ័យរឿងនេះឲ្យបានត្រឹមត្រូវទៅតាមនីតិវិធីនៃច្បាប់ ដោះស្រាយពាក់ព័ន្ធករណីរឿងសមាជិកយើងខ្ញុំដែលរងគ្រោះពិតប្រាកដ ដែលមានអំពើហិង្សាដោយស្ថានទម្ងន់ធ្ងន់។ ...អ៊ីចឹងជនដែលប្រព្រឹត្តគឺត្រូវតែទទួលទោស គឺត្រូវតែសងជំងឺចិត្ត និងការព្យាបាល»។
ទាក់ទងនឹងសំណុំរឿង អ្នកស្រី យ៉ោម បុប្ផា នេះដែរ ស្វាមីរបស់អ្នកស្រី គឺលោក លួស សាខន អាយុ ៥៦ឆ្នាំ បានមានប្រសាសន៍ថា ភរិយារបស់លោកមិនបានប្រព្រឹត្តដូចការចោទប្រកាន់នោះទេ៖ «ថ្ងៃកើតហេតុប្រពន្ធខ្ញុំគ្មាននៅកន្លែងបង្កហេតុដោយចេតនា និងជាក់ស្ដែងទេ ហើយបើមានអ្នកឃើញប្រពន្ធខ្ញុំវាយគេពិតប្រាកដមែន ប្រពន្ធខ្ញុំនឹងហ្នឹងទទួលទោសតាមច្បាប់។ ...នេះគឺជាការលាបពណ៌ ព្រោះជនរងគ្រោះក៏ខ្ញុំមិនដឹងនៅទីណាដែរ ហើយក៏គេមិនស្គាល់ខ្ញុំដែរ ហើយចំណែកឯពួកម៉ូតូឌុបទាំងអស់នេះ ក៏មិនដឹងនៅទីណាដែរ»។
ប្រធានក្រុមអ្នកស៊ើបអង្កេតនៃអង្គការការពារសិទ្ធិមនុស្សលីកាដូ (Licadho) លោក អំ សំអាត ដែលបានតាមដានបាតុកម្មរបស់អ្នកភូមិបឹងកក់ បានមានប្រសាសន៍ថា អាជ្ញាធរគប្បីស្រាវជ្រាវ និងពិនិត្យមើលអង្គហេតុនៃករណីនេះឲ្យបានជាក់លាក់៖ «ថាតើការចាប់អ្នកស្រី យ៉ោម បុប្ផា ហ្នឹងវាត្រឹមត្រូវតាមលក្ខណៈច្បាប់ដែរ ឬទេ ហើយតើមានការស៊ើបអង្កេតហ្នឹងបានត្រឹមត្រូវ ឬមួយយ៉ាងម៉េចនៅឡើយ?»។
អ្នកតាមដានស្ថានការណ៍ និងសំណុំរឿងនេះ កំពុងតែរង់ចាំមើលចំណាត់ការរបស់តុលាការថា តើអ្នកស្រី យ៉ោម បុប្ផា នោះ នឹងត្រូវបានដោះលែង ឬបន្តឃុំខ្លួនបន្តទៀតនៅគុកព្រៃសនោះ៕
0 comments:
Post a Comment