Print 
PDFដោយ សេង សេរីរ័ត្ន
2012-07-07
អង្គការសង្គមស៊ីវិលបានអះអាងថា អាជ្ញាធរនៅខេត្តព្រះវិហារ បានរំលោភសិទ្ធិសេរីភាពក្នុងការបញ្ចេញមតិ និងសេរីភាពជួបប្រជុំរបស់សហគមន៍ ។
តំណាងប្រជាពលរដ្ឋ និងពលរដ្ឋមកពីខេត្តព្រះវិហារ តវ៉ារកដំណោះស្រាយចំពោះការបណ្ដេញចេញ នៅក្បែរវិមានឯករាជ្យ រាជធានីភ្នំពេញ កាលពីថ្ងៃ៦ កុម្ភៈ ឆ្នាំ២០១២។
អ្នកសម្របសម្រួលកម្មវិធីពង្រឹងអំណាចសហគមន៍ នៃមជ្ឈមណ្ឌលសិទ្ធិមនុស្សកម្ពុជា លោក ឈឹម សាវុធ អោយដឹងនៅថ្ងៃទី០៦ ខែកក្កដា ថា មូលហេតុដែលលោកទៅធ្វើវេទិកាសាធារណៈនៅថ្ងៃទី១២ ខែកក្កដា ឆ្នាំ២០១២ ខាងមុខនេះ គឺដោយសារតែនៅក្នុងតំបន់នោះ អាជ្ញាធរមូលដ្ឋានបានរឹតត្បិតលើសិទ្ធិសេរីភាពប្រជាពលរដ្ឋ នៅក្នុងតំបន់នោះស្ទើរគ្រប់ទីកន្លែងទាំងអស់។
លោកបន្តទៀតថា មានប្រជាពលរដ្ឋជាច្រើនដែលទទួលរងនូវផលប៉ះពាល់ដោយការឈូសឆាយដី និងការកាប់បំផ្លាញព្រៃឈើខុសច្បាប់ពីសំណាក់ក្រុមហ៊ុនសម្បទាន ហើយពុំមានការទប់ស្កាត់អាជ្ញាធរស្រុកជ័យសែន ខេត្តព្រះវិហារ ឡើយ។ លោកថា ដោយសារតែប្រជាពលរដ្ឋមានការព្រួយបារម្ភចំពោះការឈូសឆាយ និងការកាប់បំផ្លាញព្រៃឈើយ៉ាងអនាធិបតេយ្យ ដែលអាចធ្វើអោយបាត់បង់ធនធានធម្មជាតិ និងដីស្រែចម្ការរបស់ពួកគាត់អស់ នាពេលដ៏ខ្លីខាងមុខនេះមិនខាន។
លោក ឈឹម សាវុធ៖ «ចេញទៅណាមកណា ឬទំនាក់ទំនងអង្គការណា មិនអោយចូលផ្សព្វផ្សាយទេ គឺមានព័ត៌មានប្រជាពលរដ្ឋថា មេភូមិគឺអត់អនុញ្ញាតិអោយប្រជាពលរដ្ឋចេញទៅណាមកណាទេ លុះត្រាតែមានអនុញ្ញាតិច្បាប់ពីភូមិ ទើបប្រជាពលរដ្ឋអាចចេញទៅបាន។ ដោយសារតែចំណុចហ្នឹងហើយ ទើបខ្ញុំមានគំនិតមួយចង់ដាក់កម្មវិធីទៅកន្លែងហ្នឹង ដើម្បីអោយប្រជាពលរដ្ឋគាត់បានលើកបញ្ហាហ្នឹង សួរទៅអាជ្ញាធរផ្ទាល់ ដូចជាតំណាងរាស្ត្រសង្គមស៊ីវិលដែរ យើងគិតថា ការធ្វើរបៀបនេះ គឺជាការរំលោភសិទ្ធិមនុស្ស រំលោភច្បាប់ទាំងស្រុងតែម្តង ពីសំណាក់អាជ្ញាធរ»។
អ្នកស្រី ភោគ ហុង ជាបណ្ដាញការពារព្រៃឡង់ នៅខេត្តព្រះវិហារ អោយដឹងថា អាជ្ញាធរនៅក្នុងភូមិរបស់គាត់ គឺមានការគាបសង្កត់ បំបិទសិទ្ធិសេរីភាព មិនអោយពួកគាត់ធ្វើការជួបប្រជុំគ្នា ដើម្បីពិភាក្សាអំពីបញ្ហាការកាប់បំផ្លាញព្រៃឡង់ និងផលប៉ះពាល់ការឈូសឆាយដីធ្លីតែប៉ុណ្ណោះ។
អ្នកស្រីបន្តទៀតថា បើទោះបីជាមានការគំរាមកំហែងពីអាជ្ញាធរមូលដ្ឋានរបស់អ្នកស្រីយ៉ាងណាក៏ដោយ ក៏អ្នកស្រីនៅតែជំនះទៅចូលរួមវេទិកាសាធារណៈរបស់មជ្ឈមណ្ឌលសិទ្ធិមនុស្សកម្ពុជា នៅថ្ងៃទី១២ ខែកក្កដា ឆ្នាំ២០១២ អោយខានតែបាន។
អ្នកស្រី ភោគ ហុង៖ «សហគមន៍ត្រូវការចំណេះដឹង ត្រូវការតស៊ូមតិ ហើយត្រូវការពារ ប៉ុន្តែគេមិនយល់ថា យើងធ្វើការនេះដើម្បីស្រឡាញ់ជាតិ ស្រឡាញ់ប្រជាពលរដ្ឋទេ គេចោទប្រកាន់ផ្លូវមួយ ដែលខ្ញុំក៏ដោយ ហើយអ្នកណាក៏ដោយ ទូទាំង ២៤ខេត្ត-ក្រុង សហគមន៍ចងបណ្ដាញមិនមែនទាក់ទងរឿងនយោបាយណា ទាក់ទងនឹងការពារព្រៃទាំងអស់ហ្នឹង»។
ដោយឡែកលោក ថោង សាកឿន អភិបាលស្រុកជ័យសែន បានច្រានចោលការចោទប្រកាន់របស់ប្រជាពលរដ្ឋថា អាជ្ញាធរមានការបំបិទសិទ្ធិសេរីភាព និងគាបសង្កត់ប្រជាពលរដ្ឋមិនអោយចេញពីមូលដ្ឋានរបស់ខ្លួន៖ «គ្មានអាជ្ញាធរណាបំបិទសិទ្ធិសេរីភាពនោះទេ»។
នៅក្នុងវេទិកាសាធារណៈស្តីពីសិទ្ធិមនុស្ស និងការអភិវឌ្ឍ នឹងផ្តល់ឱកាសជូនប្រជាពលរដ្ឋអោយលើកឡើងនូវទស្សនៈ មតិយោបល់ សំណួរ សំណូមពរ ការពិភាក្សា និងបញ្ហាផ្សេងៗ ដែលកំពុងជួបប្រទះ ទៅកាន់តំណាងរាស្ត្រ អាជ្ញាធរមូលដ្ឋាន អង្គការជាតិ អន្តរជាតិ និងអ្នកពាក់ព័ន្ធដទៃទៀត ដើម្បីរកដំណោះស្រាយសមស្រប និងនីតិវិធីមួយជូនប្រជាពលរដ្ឋ៕
0 comments:
Post a Comment