Print 
PDFដោយ ផន រីណា
2012-06-24
បន្ទាប់ពីព្រឹទ្ធសភាអាមេរិកប្រចាំរដ្ឋមីនីសូតា Minnesota បានអនុម័តទទួលស្គាល់អតីតយុទ្ធជនខ្មែរ ដែលបានជួយយោធាសហរដ្ឋអាមេរិក ក្នុងសង្គ្រាមវៀតណាមនោះមក តំណាងអង្គការសភាខ្មែរ អន្តរជាតិ បានប្រកាសស្វែងរកឈ្មោះអតីតយុទ្ធជនខ្មែរទាំងនោះ ដើម្បីបង្កើតជាបញ្ជីរួមមួយ ឲ្យរដ្ឋាភិបាលសហរដ្ឋអាមេរិក ជាពិសេស រដ្ឋអាជ្ញាធរប្រចាំរដ្ឋ Minnesota ទទួលស្គាល់ពួកគេ។សេចក្ដីអនុម័តទទួលស្គាល់អតីតយុទ្ធជនខ្មែរនេះ គឺជាប្រវត្តិសាស្ត្រដំបូងហើយ នៅក្នុងសហរដ្ឋអាមេរិក ដែលបានផ្ដល់កិត្តិយសដល់ក្រុមអតីតយុទ្ធជនខ្មែរ បម្រើយោធាអាមេរិក ដើម្បីសិទ្ធិសេរីភាព និងលទ្ធិប្រជាធិបតេយ្យ ក្នុងសង្គ្រាមវៀតណាម ក្នុងទសវត្សឆ្នាំ ១៩៧០។
«ពលរដ្ឋអាមេរិកាំងស្ទើរតែគ្មាននរណាម្នាក់សោះ ដែលបានដឹងថា ខ្មែរបានជួយសហរដ្ឋអាមេរិកក្នុងការប្រយុទ្ធ»។
ពលរដ្ឋខ្មែរអាមេរិក ជាអនុប្រធានសភាខ្មែរអន្តរជាតិ លោក ហឿន ហាច បានថ្លែងប្រាប់វិទ្យុអាស៊ីសេរីថា សេចក្ដីសម្រេចទទួលស្គាល់ជាផ្លូវការរបស់សភា និងព្រឹទ្ធសភា រដ្ឋ Minnesota នេះជាការខិតខំប្រឹងប្រែងរបស់លោក និងអតីតយុទ្ធជនខ្មែរមួយចំនួន ដែលនៅរស់រានមានជីវិត រួមជាមួយលោក Scott Walker ជានាយកសភាខ្មែរអន្តរជាតិ។ លោកបន្តថា ក្រុមអតីតយុទ្ធជនខ្មែរ ចង់បន្សល់ទុកភស្តុតាងជាផ្លូវការមួយ ដែលទទួលស្គាល់ដោយសហរដ្ឋអាមេរិកថា ពលរដ្ឋកម្ពុជាកាលជំនាន់នោះ បានចូលរួមបម្រើការងារក្នុងយោធាសហរដ្ឋអាមេរិក ហើយកូនខ្មែរជំនាន់ក្រោយ ក៏នឹងដឹងពីប្រវត្តិសាស្ត្រទាំងនេះ។
លោក ហឿន ហាច៖ «ខ្ញុំ និងលោក Scott Walker ធ្លាប់ឃើញថា ខ្មែរយើងហ្នឹង មានសម្ពន្ធភាពជាមួយអាមេរិកាំង នៅពេលខ្មែរយើងធ្លាក់ក្នុងសង្គ្រាម គាត់ និងខ្ញុំយល់ថា ខ្មែរយើងអតីតជាយុទ្ធជនហ្នឹងចាស់ អ្នកខ្លះចាស់ជរាស្លាប់។ មួយទៀតគេសម្លាប់បំបិទភស្តុតាងនៅជំនាន់កុម្មុយនិស្ត។ បើខ្ញុំមិនធ្វើនូវប្រវត្តិនេះទេ ខ្មែរយើងនៅខាងក្រោយ អត់ដឹងរឿងអតីតយុទ្ធជនខ្មែរជាមួយអាមេរិកាំងហ្នឹងណា៎។ ដូច្នេះ បានជាខ្ញុំហ្នឹងខំធ្វើ»។
លោក ហឿន ហាច ក៏បានអំពាវនាវដល់អតីតយុទ្ធជនខ្មែរទាំងអស់ ដែលនៅរស់រានមានជីវិតទាំងនៅក្នុងប្រទេស ទាំងនៅក្រៅប្រទេស ឲ្យបញ្ជូនឯកសារទៅកាន់អង្គការរបស់លោក ដើម្បីចុះឈ្មោះក្នុងបញ្ជី។
ទាក់ទងនឹងបញ្ហានេះ វិទ្យុអាស៊ីសេរី ក៍បានសាកសួរថា តើមានភស្តុតាងអ្វី ដែលសំអាងថា ជនម្នាក់ ជាអតីតយុទ្ធជនបម្រើការងារឲ្យយោធាសហរដ្ឋអាមេរិកនោះ? លោក ហឿន ហាច មានប្រសាសន៍បន្តថា ពលរដ្ឋខ្មែរស្ទើរតែទាំងអស់ ពិបាករកឯកសារណាស់ ព្រោះកម្ពុជាឆ្លងកាត់សង្គ្រាម។ ប៉ុន្តែ ពួកគេអាចរៀបរាប់ពីប្រវត្តិរបស់ពួកគេ ដើម្បីកំណត់ថា តើពួកគេពិតជាបានធ្វើការបម្រើយោធាអាមេរិកមែនឬអត់។
លោក ហឿន ហាច៖ «យើងគ្មានភស្តុតាងទេ។ ជួនកាលយើងយករឿងហ្នឹងទៅតាមសាច់រឿងគេនិយាយ ហើយជួនកាលគេអាចបន្លំ ជួនកាលគេមិនអាចបន្លំ ពីព្រោះថា ការដែលយើងយកសាច់រឿងមក យើងជឿថា បុគ្គលហ្នឹងគេនិយាយពិតយើងក៏យកសម្ដីបុគ្គលម្នាក់គេនិយាយរឿងដែរ»។
អតីតយុទ្ធជនខ្មែរ និងជាពលរដ្ឋអាមេរិកាំង រស់នៅក្នុងសហរដ្ឋអាមេរិក លោក សួស ហឿន មានប្រសាសន៍ប្រាប់វិទ្យុអាស៊ីសេរីថា លោកមានការចងចាំច្រើននូវរឿងរ៉ាវនៅសម័យនោះ លោកបានលើកឡើងដែរថា លោកធ្លាប់បានទៅប្រយុទ្ធនឹងទាហានយៀកកុង វៀតណាមខាងជើង។
លោក សួស ហឿន៖ «ខ្ញុំចូលជា BE ហើយហ្នឹងខ្ញុំទៅវ៉ៃនៅអ្នកលឿងហ្នឹង ព័ទ្ធអាម៉េរិកាំងហើយ។ ខ្ញុំសូមជម្រាបថា កាលឆ្នាំ ១៩៧០ អាហ្នឹងវាយជាមួយយួនផ្ទាល់ហើយ នៅសៀមរាបក្រឡាញ់។ដល់តែវាយជាមួយយួនបែកអស់ហើយហ្នឹង ក៏ទៅបើកផ្លូវទឹកពីអ្នកលឿងទៅស្រុកយួន តាមពារាំងក្រោមលើហ្នឹង។ វាយខ្លាំងដែរមកពីហ្នឹងវិញ បានចូលមកជិតភ្នំពេញហ្នឹង។ កាលហ្នឹង គេហៅយៀកកុងយួនហ្នឹង»។
ទាក់ទងនឹងសេចក្ដីសម្រេចចិត្តទទួលស្គាល់អតីតយុទ្ធជនខ្មែរដែលពីរដ្ឋ Minnesota នេះ លោក ហឿន ហាច មានប្រសាសន៍ថា នេះគ្រាន់តែជាជំហានដំបូងមួយ ហើយបច្ចុប្បន្ននេះ អង្គការរបស់លោកកំពុងធ្វើយុទ្ធនាការនៅរដ្ឋធានីវ៉ាស៊ីនតោន ដើម្បីឲ្យព្រឹទ្ធសមាជិកនៃរដ្ឋផ្សេងទៀតទទួលស្គាល់។
លោកសង្ឃឹមថា នៅមានអតីតយុទ្ធជនខ្មែរជាច្រើនទៀត ដែលនៅរស់ ហើយនឹងចេញមកបង្ហាញខ្លួនចុះក្នុងបញ្ជីឈ្មោះ។ អតីតយុទ្ធជនខ្មែរ អាចទាក់ទងអង្គការរបស់លោកបាន តាមការផ្ញើសារអេឡិចត្រូនិច bonh@hotmail.com ឬហៅទូរស័ព្ទមកលេខ ៦៥១៤២៨០៥០២។
0 comments:
Post a Comment