Print 
PDF- Friday, 06 January 2012 12:03
- ឆាយ ច័ន្ទនីដា
លោក ថ្លែងថា ការប្រកាសដែលមានវត្តមានម៉ឹក ដារ៉ា និងជា ឡេង ដែលមានចៅក្រមបីរូបគឺប្រធានក្រុមប្រឹក្សា លោកចៅក្រម អ៊ិត សម្ផស្ស ចៅក្រម ធាម ច័ន្ទពិសិដ្ឋ និងចៅក្រម អ៊ឹម វណ្ណៈ បានឲ្យដឹងថា៖ «ម៉ឹក ដារ៉ា ជាឡេង និងម៉ន ឌឿន បានយកស្ថាប័នរដ្ឋមកប្រព្រឹត្តអំពើពុករលួយកែអង្គហេតុ និងបន្ធូរបន្ថយទោសជនល្មើសគ្រឿងញៀន»។
ម៉ឹក ដារ៉ា និង ជា ឡេង ត្រូវបានចាប់ខ្លួននៅខែមករា ឆ្នាំ២០១១ ក្រោមការឆ្លើយដាក់ពីអតីតស្នងការខេត្តបន្ទាយមានជ័យ ហ៊ុន ហ៊ាន និងស្នងការរង ឈៀង សុន ដែលអ្នកទាំងពីរនេះ ត្រូវតុលាការខេត្ត បានផ្តន្ទាទោសដាក់ពន្ធនាគារក្នុងម្នាក់ៗ ៤ឆ្នាំ។
លោកចៅក្រម ធាម ច័ន្ទពិសិដ្ឋ បានថ្លែងថា សាលក្រម ដែលប្រកាស កាលពីម្សិលមិញក៏បានបញ្ជាឲ្យចាប់ខ្លួនជនជាប់ចោទដែលរត់គេច ខ្លួន ម៉ន ឌឿន ដែលបានកាត់ទោសកំបាំងមុខត្រូវទទួលទោសចំនួន ២៥ ឆ្នាំ។ លោកថ្លែងថា៖«យើងមានដីកាឲ្យចាប់ខ្លួនគាត់ (ម៉ន ឌឿន)»។
លោក ណុប វីរៈ បានឲ្យដឹងថា តុលាការ ក៏បានពិន័យជាប្រាក់ដល់ម៉ឹក ដារ៉ា ប្រាក់គុណនឹងពីរនៃប្រាក់ស៊ីសំណូក កាលខ្លួនជាមន្ត្រីជាន់ខ្ពស់ក្រសួងមហាផ្ទៃ ដែលមានទឹកប្រាក់សរុបជាង ២២ ម៉ឺន ៥ ពាន់ ៤ រយដុល្លារ និងឲ្យគាត់បង់ប្រាក់១០ ម៉ឺនដុល្លារសម្រាប់ការកេងប្រវ័ញ្ចយកទៅសង់គេហដ្ឋានខ្លួនឯង។ តុលាការក៏បានដកហូតដី ២ កន្លែងនៅកំពង់ចាម ១ កន្លែង នៅស្រុកបាណន់ខេត្តបាត់ដំបង និងប្រាក់ក្នុងធនាគារចំនួនជាង ៨ ម៉ឺន ៧ពាន់ដុល្លារ ទុកជាសម្បត្តិរដ្ឋ។
មន្ត្រីអងេ្កតបន្តថា សាលក្រមនេះ និយាយថា ម៉ឹក ដារ៉ា និងជា ឡេង មិនព្រមផ្តល់សក្ខីកម្មបង្ហាញការពិតដល់តុលាការ ហើយនិយាយពង្វាង មិនអាចឲ្យតុលាការជឿបាន»។
ម៉ឹក ដារ៉ាបន្ទាប់ពីស្តាប់សាលក្រមនេះ បាននិយាយប្រាប់អ្នកសារព័ត៌មានក្រៅសវនាកាថា លោកមិនអាចទទួលយកបាននូវការសាលក្រមនេះទេ ព្រោះមិនមានភស្តុតាងជាក់ស្តែងក្នុងការដាក់បន្ទុកលោក។ លោក ថ្លែងថា ៖«ខ្ញុំមិនបានប្រព្រឹត្តដូចអ្វីដែលបានចោទនោះទេ។ ខ្ញុំក៏ប្លែកដែរ កាត់ទោសខ្ញុំមាត្រា ៣៤ (ច្បាប់គ្រឿងញៀន) គឺកាត់ទោសមួយជីវិត ដែលកាត់ក្តីខ្ញុំ ជាមេជួញដូរគ្រឿងញៀន ប៉ុន្តែគ្មានគ្រឿងញៀនមួយគ្រាប់ផងហ្នឹង។ ចំពោះឧត្តមគតិ និងគំនិតខ្ញុំ គ្មានគំនិតណាមួយទៅជួញដូរគ្រឿងញៀនដូចការចោទនោះទេ»។
លោកបន្តថា លោកនឹងពិចារណាជាមួយមេធាវីលោក ដើម្បីប្តឹងបន្ត។ លោកបាននិយាយថា ៖ «ចំពោះសកម្មភាពរបស់ខ្ញុំ បេះដូងរបស់ខ្ញុំ ជាអ្នកបង្ក្រាបគ្រឿងញៀន ខ្ញុំគ្មានគំនិតណាមួយ ទៅធ្វើសកម្មភាពឧក្រិដ្ឋប្រឆាំងនឹងច្បាប់ប្រឆាំងទៅនឹងរដ្ឋាភិបាល ឬក៏ប្រព្រឹត្តបទល្មើសណាមួយទៅសមគំនិតជាមួយឧក្រិដ្ឋជននោះទេ»។ លោកជឿជាក់ថា តុលាការនឹងស្រាវជ្រាវបន្ត រកជនល្មើសដែលពាក់ព័ន្ធក្នុងសំណុំរឿងនេះ។ លោកថ្លែងថា៖ «អ្វីដែលខ្ញុំបានប្រព្រឹត្ត អ្វីដែលខ្ញុំបានធ្វើ ខ្ញុំដឹងខ្លួនខ្ញុំ ប៉ុន្តែរឿងនេះ ខ្ញុំមិនបានធ្វើទេ»។
លោក រាយ ប៊ុនឌឿន មេធាវីការពារជនជាប់ចោទ ម៉ឹក ដារ៉ា ថ្លែងថា ការប្រកាសសាលក្រមនេះ អយុត្តិធម៌ណាស់ សម្រាប់កូនក្តី។ លោក ថ្លែងថា ៖ «វាធ្ងន់ធ្ងរណាស់ ព្រោះតាំងពីថ្ងៃសវនាការក្តី ការសួរដេញដោល មិនមានភស្តុតាងអ្វីជាក់លាក់ទេ»។
លោកបានហៅការផ្តន្ទាទោសនេះថា ធ្ងន់ជាងការដាក់ទោសអតីតមេដឹកនាំខ្មែរក្រហម កាំង ហ្កេកអ៊ាវហៅឌុច ដែលសម្លាប់មនុស្ស ជាង ១២០០០ នាក់។ លោកថា ៖ «ឌុច ជាប់តែ ១៩ ឆ្នាំនៅពេលកាត់កងរួច។ តែនេះគាត់ (ម៉ឹក ដារ៉ា) ធ្លាប់ជាមន្ត្រីមានគុណសម្បត្តិបម្រើប្រទេសជាតិ។ ទីបំផុតឯកសារ (ដាក់បន្ទុក) គ្មានសោះ មានតែការឆ្លើយដាក់ពីពិរុទ្ធជន»។
មន្ត្រីសិទ្ធិមនុស្សលោក ណុប វីរៈ ថ្លែងថា៖ «ការកាត់ទោសនេះជាឧទាហរណ៍ សម្រាប់មន្ត្រីផ្សេងទៀត កុំឲ្យប្រព្រឹត្តពុករលួយ»។ តែទោះយ៉ាងណា លោកថា នេះមិនមែនជាឧទាហរណ៍សម្រាប់ការអនុវត្តច្បាប់ដ៏ល្អឡើយ ព្រោះអ្នកសមគំនិត និងអ្នកធ្វើជាសាក្សីក្នុងតុលាការ មិនត្រូវបានផ្តន្ទាទោសឡើយ។ លោកណុប វីរៈ និយាយថា ៖ «អ្នកផ្តល់សក្ខីកម្ម សុទ្ធតែជាអ្នកចូលរួមកែអង្គហេតុ និងទទួលកម្រៃក្នុងរឿងពុករលួយនេះ។ ដូច្នេះការកាត់ទោសនេះមិនមែនជាការអនុវត្តច្បាប់ដ៏ត្រឹមត្រូវទេ ព្រោះកាត់ទោសតែបុគ្គលប៉ុន្មានរូបប៉ុណ្ណោះ»៕
0 comments:
Post a Comment