Print 
PDFដោយ ហង្ស សាវយុត
2011-12-22
សំឡេងផ្ទុះលាន់ឮខ្លាំងនៅលើលំហអាកាស និងមានបំណែកលោហធាតុផ្ទាំងៗមួយចំនួនបានធ្លាក់ចុះមកដី ដែលទំនងជាបំណែករបស់យន្តហោះស៊ើបការណ៍ បានកើតមានជាថ្មីទៀតនៅលើកំពូលភ្នំប្រាសាទព្រះវិហារ នៃស្រុកជាំក្សាន្ត កាលពីព្រឹកថ្ងៃទី២២ ខែធ្នូ។
សមត្ថកិច្ចពិនិត្យមើលបំណែកលោហធាតុ សង្ស័យថាជាបំណែករបស់យន្តហោះយកការណ៍គ្មានមនុស្សបើកបរ ដែលសមត្ថកិច្ចរកឃើញនៅខេត្តព្រះវិហារ នៅថ្ងៃទី១៦ ខែសីហា ឆ្នាំ២០១១។
លោកឧត្ដមសេនីយ៍ឯក ស្រី ឌឹក ជាមេបញ្ជាការកងយោធពលខេមរភូមិន្ទនៃកងពលធំអន្តរាគមន៍លេខ៣ ដែលគ្រប់គ្រងយោធាខ្មែរនៅតំបន់ជុំវិញប្រាសាទព្រះវិហារ។ លោកបានមានប្រសាសន៍កាលពីរសៀលថ្ងៃព្រហស្បតិ៍ ទី២២ ខែធ្នូ ថា កាលពីវេលាម៉ោងប្រមាណ ១០ និង ៣០នាទីព្រឹក គេបានឭសំឡេងនៅលំហអាកាសហាក់ដូចជាយន្តហោះ ក៏ប៉ុន្តែបន្តិចក្រោយមកគេបានឮសំឡេងផ្ទុះយ៉ាងខ្លាំង ហើយមានផ្ទាំងលោហធាតុជាច្រើនដុំបានធ្លាក់ចុះមករាយប៉ាយនៅលើដី នៃបរិវេណប្រាសាទព្រះវិហារ។
លោកឧត្ដមសេនីយ៍ឯក ស្រី ឌឹក៖ «យន្តហោះស្អីយើងមិនទាន់ដឹងដែរ ប៉ុន្តែបំណែកកន្លែងខ្លះវាមានដល់ទៅទំហំ ១.២ (ម៉ែត្រ) វាធ្លាក់ពាសពេញនៅតំបន់ប្រាសាទយើងនោះ ហើយយើងមិនទាន់សន្និដ្ឋានថា វាយ៉ាងម៉េចទេ ព្រោះខាងគណៈកម្មការគេកំពុងដើរថត។ គេប្រមូលបានជាច្រើនដែរហើយនៅលើហ្នឹង ប៉ុន្តែនៅសល់ប្រហែលជា ៥០% ទៀត»។
មេបញ្ជាការយោធាខ្មែរដដែលបានមានប្រសាសន៍ថា ជារៀងរាល់ថ្ងៃតែងមានអ្នកទេសចរមួយចំនួន ដើរទស្សនាប្រាសាទព្រះវិហារ ក៏ប៉ុន្តែវាជាសំណាងល្អ នៅពេលដែលបំណែកលោហធាតុធ្លាក់ពីលើមេឃមកដីនោះ មិនមានអ្នកណាម្នាក់រងគ្រោះថ្នាក់ឡើយ ដោយសារតែចំពេលដែលពួកគេចូលសម្រាកនៅតាមកន្លែងផ្សេងៗ។
លោកឧត្តមសេនីយ៍ ស ថាវី ជាអភិបាលរងខេត្តព្រះវិហារ។ លោកបានមានប្រសាសន៍ថា អាជ្ញាធរខេត្តកំពុងស្នើសុំឱ្យសមត្ថកិច្ចប្រមូលយកបំណែកលោហធាតុដែល ធ្លាក់រាយប៉ាយនៅបរិវេណប្រាសាទទាំងនោះ ដើម្បីធ្វើរបាយការណ៍ជូនទៅអភិបាលខេត្ត និងបញ្ជូនទៅឱ្យក្រុមអ្នកសង្កេតការណ៍បទឈប់បាញ់ ដែលកំពុងប្រចាំការនៅតំបន់នោះផង។
លោកឧត្តមសេនីយ៍ ស ថាវី៖ «ព្រឹកមិញនេះ (២២ ធ្នូ) ខ្ញុំឮសូរសំឡេងផ្ទុះដូចកាលដែលនៅឯគូលែនដូចគ្នាអ៊ីចឹង ប៉ុន្តែគ្រាន់តែអានេះវាផ្ទុះយូរជាង។ មួយសន្ទុះក្រោយមកទៅក៏កងទ័ពថា មានអំបែងធ្លាក់នៅលើប្រាសាទមានជាដឺរ៉ា មានជាស្អី ដូចយើងបំណែកនៅឯស្រុកគូលែនអ៊ីចឹង ខ្លះធ្លាក់មកដល់ឯស្វាយជ្រំឯនោះទៀត»។
កាលពីថ្ងៃទី១៦ ខែសីហា កន្លងទៅ ហេតុការណ៍ផ្ទុះលាន់ឮខ្លាំងនៅក្នុងលំហអាកាស និងមានបំណែកលោហធាតុធ្លាក់ចុះមកដីនោះ ធ្លាប់កើតមានម្ដងមកហើយនៅភូមិសាស្ត្រភូមិគូលែន ខាងត្បូងនៃឃុំស្រយ៉ង់ ស្រុកគូលែន ចម្ងាយប្រមាណ ៩០គីឡូម៉ែត្រ ភាគខាងត្បូងឆៀងខាងកើតពីតំបន់ប្រាសាទព្រះវិហារ។
លោកនាយករដ្ឋមន្ត្រី ហ៊ុន សែន កាលពីថ្ងៃទី១៨ ខែសីហា ឆ្នាំ២០១១ កន្លងទៅ ធ្លាប់បានអំពាវនាវសុំឲ្យអ្នកជំនាញផ្នែកភេរវកម្មរបស់សហរដ្ឋ អាមេរិក អូស្រ្តាលី កម្ពុជា និងថៃ រួមសហការគ្នាបើកការស៊ើបអង្កេតជាបន្ទាន់មួយ ជុំវិញការផ្ទុះយន្តហោះដែលគ្មានមនុស្សបើក បន្ទាប់ពីមានហេតុការណ៍ផ្ទុះធ្លាក់បំណែកលោហធាតុជាច្រើន កាលពីថ្ងៃទី១៦ ខែសីហា នៅក្នុងស្រុកគូលែននោះ។
លោកនាយករដ្ឋមន្ត្រី ហ៊ុន សែន ធ្លាប់បានអះអាងទៅលើហេតុការណ៍ផ្ទុះ កាលពីថ្ងៃទី១៦ ខែសីហា ថា លោកមិនជឿថា នេះគឺជាប្រភេទយន្តហោះស៊ើបការណ៍សម្ងាត់របស់ថៃទេ ប៉ុន្តែលោកសង្ស័យថា វាជារបស់ក្រុមភេរវកម្មណាមួយដែលយកតំបន់គ្មានមនុស្សរស់នៅ ដើម្បីសាកល្បង និងដើម្បីគំរាមកំហែងលើប្រទេសណាមួយ ដែលជាសម្ព័ន្ធមិត្តរបស់សហរដ្ឋអាមេរិកនៅក្នុងតំបន់៕
0 comments:
Post a Comment