Print 
PDFដោយ មឿង ទុម
2011-12-23
អង្គការអន្តរជាតិធំៗ ចំនួន ១១អង្គការ កំពុងមានក្ដីកង្វល់ខ្លាំងចំពោះចំណុចអវិជ្ជមាននៃសេចក្ដីព្រាង ច្បាប់របស់កម្ពុជា ស្ដីពីអង្គការសមាគម។
២០-ធ្នូ-២០១១៖ តំណាងសមាគម និងអង្គការមិនមែនរដ្ឋាភិបាល ឈរលើកបដាអមដោយញត្តិមានផ្ដិតស្នាមមេដៃ ជំទាស់នឹងសេចក្ដីព្រាងច្បាប់គ្រប់គ្រងសមាគម និងអង្គការមិនមែនរដ្ឋាភិបាល នៅខាងមុខរដ្ឋសភា។
ក្នុងសេចក្ដីថ្លែងការណ៍រួមកាលពីថ្ងៃព្រហស្បតិ៍ ទី២២ ខែធ្នូ ឆ្នាំ២០១១ អង្គការទាំង ១១នោះ បានអំពាវនាវដល់ម្ចាស់ជំនួយអន្តរជាតិ ដែលបានផ្ដល់ថវិកាជំនួយដល់កម្ពុជា ក្នុងមួយៗឆ្នាំនូវទឹកប្រាក់ជិតស្មើនឹងពាក់កណ្ដាលនៃកញ្ចប់ថវិកា ជាតិ សូមធ្វើយ៉ាងណាបញ្ជាក់ឲ្យបានច្បាស់ជាមួយរដ្ឋាភិបាលកម្ពុជា ថា សេចក្ដីព្រាងច្បាប់លើកទី៤ របស់កម្ពុជា ស្ដីពីអង្គការសមាគមត្រូវតែកែសម្រួលឡើងវិញ ដើម្បីការពារសិទ្ធិរបស់អង្គការសង្គមស៊ីវិល បើពុំនោះទេ កម្ពុជាគប្បីដកសេចក្ដីព្រាងច្បាប់នេះចេញ។
អង្គការអន្តរជាតិទាំងនោះ បានបញ្ជាក់នៅក្នុងសេចក្ដីថ្លែងការណ៍រួមថា គ្រប់ចំណុចនៃការកែសម្រួលសេចក្ដីព្រាងច្បាប់នេះ គប្បីមានការចូលរួមប្រឹក្សាពីសំណាក់អង្គការសង្គមស៊ីវិល និងសំដៅគាំទ្រសកម្មភាពនៃកិច្ចការងាររបស់អង្គការសង្គមស៊ីវិល ចៀសវាងបង្កើតទម្រង់ច្បាប់ដែលអនុញ្ញាតឲ្យមានការរំលោភបំពានលើ សិទ្ធិ ដែលឈានដល់ការបិទអង្គការ ឬមិនព្រមចុះឈ្មោះឲ្យអង្គការសង្គមស៊ីវិលនោះឡើយ។
សេចក្ដីថ្លែងការណ៍នេះ បានរិះគន់ថា សេចក្ដីព្រាងច្បាប់ ទី៤ របស់កម្ពុជា ស្ដីពីអង្គការសមាគមនោះ មានភាពមិនច្បាស់លាស់ជាច្រើនប្រការ ដែលនឹងអនុញ្ញាតឱ្យរដ្ឋាភិបាលបញ្ជាបិទ ឬមួយបដិសេធមិនទទួលចុះបញ្ជីឱ្យអង្គការសង្គមស៊ីវិល ឬសមាគមនៅកម្ពុជា ទាំងឡាយណាដែលទិតៀនរដ្ឋាភិបាល។ បញ្ហានេះជាការរំលោភរដ្ឋធម្មនុញ្ញនៃប្រទេសកម្ពុជា និងរាល់សន្ធិសញ្ញាអន្តរជាតិដែលប្រទេសកម្ពុជា បានចុះហត្ថលេខា។ ប៉ុន្តែរដ្ឋាភិបាលកម្ពុជា មកដល់ព្រលឹមថ្ងៃសុក្រ ទី២៣ ខែធ្នូ នេះ នៅមិនទាន់បានឆ្លើយតបថា យ៉ាងណានោះទេ ចំពោះសេចក្ដីថ្លែងការណ៍របស់អង្គការអន្តរជាតិធំៗទាំង ១១នេះ៕
0 comments:
Post a Comment