Print 
PDFច័ន្ទ 28 វិច្ឆិការ 2011
នៅព្រឹកថ្ងៃចន្ទនេះ យ៉ាងហោចណាស់អ្នកភូមិបឹងកក់ចំនួន៣នាក់ ត្រូវអាជ្ញាធរក្រុងភ្នំពេញចាប់ខ្លួនជាបន្តបន្ទាប់បញ្ជូនទៅកាន់ស្នងការនគរបាលក្រុង ក្រោយពីពួកគាត់ប្រមាណ២០០នាក់ បានប្រមូលផ្តុំគ្នាធ្វើការតវ៉ានៅខាងមុខសាលាក្រុងភ្នំពេញ ទាមទារឲ្យអាជ្ញាធរពន្យល់ពីការវាស់វែង និងកំណត់ទីតាំងព្រំប្រទល់ដីទំហំ១២,៤៤ហិកតាឲ្យបានច្បាស់លាស់។
អ្នកភូមិដែលត្រូវអាជ្ញាធរចាប់ខ្លួននោះ ត្រូវគេឲ្យដឹងថា មាន អ្នកស្រី ទេព វន្នី, អ្នកស្រី បូវ ឆវី និងអ្នកស្រី ហេង មុំ។ ហើយជាមួយគ្នានេះ ក៏មានសេចក្តីរាយការណ៍ឲ្យដឹងផងដែរថា អ្នកភូមិ៤នាក់ផ្សេងទៀតបានដួលសន្លប់ក្នុងពេលប៉ះទង្គិចគ្នាជាមួយក្រុមអាជ្ញាធរ ហើយក្នុងនោះអ្នកភូមិម្នាក់បានព្យាយាមអា.កដៃសម្លាប់ខ្លួនព្រោះតែរងនូវភាពអយុត្តិធម៌ពីសំណាក់អាជ្ញាធរ។
បញ្ហានៅតំបន់បឹងកក់បានកើតឡើងជាបន្តបន្ទាប់ ក្រោយពីអាជ្ញាធរក្រុងភ្នំពេញកាលពីឆ្នាំ២០០៧បានប្រគល់ដីតំបន់នេះទំហំ១៣៣ហិកតាឲ្យទៅក្រុមហ៊ុនស៊ូកាគូអ៊ីនធ្វើការអភិវឌ្ឍន៍រយៈពេល៩៩ឆ្នាំ។ ដែលគម្រោងអភិវឌ្ឍន៍នេះ បានធ្វើឲ្យប្រជាពលរដ្ឋប្រមាណ៤ពាន់គ្រួសារត្រូវរុះរើផ្ទះសម្បែង។ បច្ចុប្បន្ននៅសល់ប្រជាពលរដ្ឋប្រមាណជាង១ពាន់គ្រួសារប៉ុណ្ណោះដែលបានព្យាយាមធ្វើការតវ៉ា ទោះជាត្រូវរងការបង្រ្កាបពីសំណាក់អាជ្ញាធរជាច្រើនលើកច្រើនសារក៏ដោយ។ ទីបំផុតកាលពីពាក់កណ្តាលខែសីហា នាយករដ្ឋមន្រ្តីខ្មែរ ហ៊ុន សែន បានសម្រេចចេញអនុក្រឹត្យមួយ ដោយកាត់ដីទំហំ២២,៤៤ហិកតាចេញពីផ្ទៃដីគម្រោងអភិវឌ្ឍន៍ សម្រាប់អ្នកភូមិធ្វើការអភិវឌ្ឍន៍នៅនឹងកន្លែង។ ប៉ុន្តែទោះជាយ៉ាងណាក៏ដោយ ផ្ទះរបស់អ្នកភូមិនៅតែត្រូវគេបំផ្លាញ និងបណ្តេញចេញ ព្រោះតែភាពមិនច្បាស់លាស់នៃផ្ទៃដីដែលត្រូវផ្តល់ឲ្យនោះ៕
0 comments:
Post a Comment