ដោយ អ៊ួន ឈិន
2011-10-18
នៅ ថ្ងៃទី១៨ ខែតុលា ឆ្នាំ២០១១ តំណាងអ្នកភូមិបឹងកក់មួយរូប បានចូលខ្លួនទៅកាន់តុលាការតាមការកោះហៅ តែមន្ត្រីតុលាការបានលើកពេលមិនធ្វើការសាកសួរទេ ដោយអះអាងថា មានអ្នកតាមមកគាំទ្រច្រើនពេកដែលនាំឲ្យពិបាកធ្វើការ។អ្នកស្រី ទេព វន្នី ថ្លែងបន្ទាប់ពីអ្នកស្រីចាកចេញពីតុលាការថា អ្នកស្រីនិងប្រជាពលរដ្ឋតំបន់បឹងកក់ដទៃទៀតបានធ្វើការតវ៉ាជាច្រើន លើកច្រើនសា តាមកំហឹងដែលពួកគាត់មានប្រឆាំងនឹងការអភិវឌ្ឍដែលធ្វើឲ្យប៉ះពាល់ ដល់ការរស់នៅរបស់ពួកគាត់។
ចំណែកតំណាងរាស្ត្រគណបក្ស សម រង្ស៊ី អ្នកស្រី មូរ សុខហួរ វិញ មានប្រសាសន៍ថា ការដែលតុលាការលើកពេលមិនសាកសួរចុងចោទ គឺជាការធ្វើឲ្យខាតពេលវេលារបស់តំណាងប្រជាពលរដ្ឋតំបន់បឹងកក់ និងអ្នកគាំទ្រទាំងអស់ដែលបានអញ្ជើញមកដល់តុលាកា។
លោក អំ សំអាត អ្នកគ្រប់គ្រងបច្ចេកទេសការិយាល័យស៊ើបអង្កេតនៃអង្គការសិទ្ធិមនុស្ស លីកាដូ ដែលបានផ្ដល់មេធាវីការពារក្ដីសម្រាប់ចុងចោទជាតំណាងប្រជាពលរដ្ឋ តំបន់បឹងកក់ សម្ដែងការស្វាគមន៍ចំពោះចំណាត់ការរបស់តុលាការក្នុងរឿងក្ដីនៅថ្ងៃ ដំបូងនេះ។
មុនពេលអ្នកស្រី ទេព វន្នី ចូលទៅក្នុងតុលាការ រូបគាត់និងតំណាងប្រជាពលរដ្ឋជាស្ត្រីទាំងអស់ ៥រូប ដែលស្លៀកពាក់ដូចជាដូនជី គឺសំពត់ស និងអាវស ពានាក្រមាពណ៌ស ពាក់ម៉ាសដែលមានគូសសញ្ញាជើងក្អែក ហើយកាន់កញ្ចប់រុំដោយកំណាត់សដែរ មើលទៅដូចកញ្ចប់អដ្ឋិធាតុបន្តិច ដូចជាស្លាដក់បន្តិច តែក្រោយពេលដែលពួកគាត់លាកញ្ចប់នីមួយៗ គឺមានចានខ្សាច់ និងស្លាកសរសេរជាអក្សរក្រហមដូចឈាមថា "ខ្ញុំការពារផ្ទះត្រូវគេចោទ គ្រាន់តែនិយាយត្រូវគេចោទ ផ្ទះខ្ញុំត្រូវគេកម្ទេចអស់ហើយ ខ្ញុំត្រូវគេចោទ តើដី ១២ហិកតារនៅឯណា?”។
តំណាងប្រជាពលរដ្ឋទាំង ៦រូប ដែលរងការចោទប្រកាន់ពីបទបរិហារកេរ្តិ៍ បានលុតជង្គង់បែរមុខទៅរកតុលាការ ហើយរួមទាំងអ្នកគាំទ្រទាំងអស់ផង បានអង្វរករសូមឲ្យតុលាការពិចារណា និងចាត់ការករណីរឿងក្ដីរបស់ពួកគាត់តាមនីតិវិធី ដើម្បីនាំមកនូវយុត្តិធម៌សម្រាប់ពួកគាត់ ដោយពួកគាត់អះអាងថា ពួកគាត់គ្មានកំហុសទេ។
បុរសម្នាក់ដែលជាតំណាងប្រជាពលរដ្ឋដែរ ដែលផ្ទះរបស់គាត់ត្រូវក្រុមហ៊ុនស៊ូកាគូ កម្ទេចកាលពីថ្ងៃទី១៦ ខែកញ្ញា ឆ្នាំ២០១១ ហើយរូបគាត់កំពុងតែរងការចោទប្រកាន់ដែរ លោក ដួង គា សម្ដែងក្ដីសង្ឃឹមថា តុលាការនឹងផ្ដល់យុត្តិធម៌ដល់ពួកគាត់។
តំណាងប្រជាពលរដ្ឋម្នាក់ទៀតជាស្ត្រីដែលផ្ទះរបស់គាត់ត្រូវគេ កម្ទេចកាលពីថ្ងៃទី១៦ ខែកញ្ញា ហើយរូបគាត់ត្រូវចូលខ្លួនទៅកាន់តុលាការនៅព្រឹកថ្ងៃទី១៩ ខែតុលា ឆ្នាំ២០១១ ទាក់ទិននឹងការចោទប្រកាន់ក្រោមបទបរិហារកេរ្តិ៍ អ្នកស្រី ហេង មុំ ថ្លែងទុក្ខដែលកើតចេញពីការបាត់បង់ទ្រព្យសម្បត្តិ និងផ្ទះសម្បែង។
អ្នសស្រី ទេព វន្នី បានឲ្យដឹងនៅរសៀលថ្ងៃទី១៨ ខែតុលា ឆ្នាំ២០១១ ថា អ្នកស្រីបានទទួលដំណឹងពីមន្ត្រីសាលាដំបូងរាជធានីភ្នំពេញ អំពីការលើកពេលមិនសាកសួរអ្នកស្រី ហេង មុំ នៅព្រឹកថ្ងៃទី១៩ ខែតុលា ឆ្នាំ២០១១ ទេ ហើយក៏មិនទាន់កំណត់ថា នឹងលើកពេលនៃការសាកសួរទៅថ្ងៃណាដែរ។
ក្រៅពីការប្ដឹងចោទចំពោះតំណាងប្រជាពលរដ្ឋទាំង ៦រូប ពីសំណាក់មន្ត្រីអាជ្ញាធរក្រោមបទបរិហារកេរ្តិ៍ ប្រជាពលរដ្ឋ ៨រូប តំណាងឲ្យប្រជាពលរដ្ឋ ៨គ្រួសារបានប្ដឹងចោទប្រកាន់ចំពោះក្រុមហ៊ុនស៊ូកាគូ និងមន្ត្រីដែលពាក់ព័ន្ធពីបទបំផ្លិចបំផ្លាញទ្រព្យសម្បត្តិ និងផ្ទះសម្បែងរបស់ពួកគាត់។
ប្រជាពលរដ្ឋដែលបានដាក់ពាក្យបណ្ដឹងមួយចំនួន បានចូលទៅបំភ្លឺនៅសាលាដំបូងរាជធានីភ្នំពេញ កាលពីថ្ងៃទី១៨ ខែតុលា ឆ្នាំ២០១១ ហើយ ហើយពួកគាត់បានសម្ដែងការពេញចិត្តថា មន្ត្រីតុលាការបានយកចិត្តទុកដាក់ចាត់ការលើពាក្យបណ្ដឹងរបស់ពួក គាត់៕
0 comments:
Post a Comment