Print 
PDFភ្នំពេញៈ សាលាដំបូងរាជធានីភ្នំពេញបានចេញដីកាកោះហៅប្រធានគណបក្ស សម រង្ស៊ី ដែលជាបក្សប្រឆាំងឲ្យចូលរួមសវនាការនាថ្ងៃព្រហស្បតិ៍ ទី២២ ខែ កញ្ញាខាងមុខនេះ ទាក់ទិននឹងករណីបរិហារកេរ្តិ៍និងផ្សព្វផ្សាយព័ត៌មានមិនពិតថា លោក ហោ ណាំហុង រដ្ឋមន្ត្រីក្រសួងការបរទេសមានតួនាទី នៅកន្លែងឃុំឃាំងក្នុងរបបខ្មែរក្រហម។
ក្នុងដីកាកោះដែលចេញថ្ងៃព្រហស្បតិ៍ដោយលោក សៀង សុខ ព្រះរាជអាជ្ញារងអមសាលាដំបូងរាជធានីបានបង្គាប់ឲ្យលោក សម រង្ស៊ី ប្រធានគណបក្ស សម រង្ស៊ី ឲ្យចូលបង្ហាញខ្លួននៅបន្ទប់សវនាការតុលាការនាថ្ងៃទី២២
ខែកញ្ញា នៅវេលាម៉ោង១៤និង៣០នាទី ជាកំហិតដើម្បីបើកសវនាការទៅលើករណីបណ្តឹងទាស់។លោក សម រង្ស៊ី បានរងនូវការចោទប្រកាន់ពីបទបរិហារកេរ្តិ៍ និងផ្សព្វផ្សាយព័ត៌មានមិនពិតធ្វើឡើងលើលោក ហោ ណាំហុង កាលពីថ្ងៃទី ១៧ ខែមេសា ឆ្នាំ ២០០៨ នៅពេលលោកថ្លែងក្នុងអំឡុងពេលចូលរួមក្នុងពិធីឧទ្ទិសរំឭកដល់ ប្រជាជនដែលត្រូវបានសម្លាប់ក្នុងរបបខ្មែរក្រហមនៅ យោងតាមពាក្យបណ្តឹងឆ្នាំ ២០០៨ លោក សម រង្ស៊ី បានចោទថា លោក ហោ ណាំហុង ថាធ្លាប់ធ្វើជាមេគុកបឹងត្របែកនៅក្រោមរបបខ្មែរក្រហម។ លោក ហោ ណាំហុង ទទួលបានជោគជ័យក្នុងបណ្តឹងស្រដៀងគ្នានេះ នៅប្រទេសបារាំងកាលពីឆ្នាំ ២០០៨ ដែលពេលនោះតុលាការបានពិន័យជានិមិត្តរូបចំពោះលោក សម រង្ស៊ី សម្រាប់ការរៀបរាប់របស់គាត់នៅក្នុងសៀវភៅជីវប្រវត្តិរបស់ខ្លួន។ បទចោទប្រកាន់នោះធ្វើឡើងតាមមាត្រា៦៣ និង៦២ នៃក្រមព្រហ្មទណ្ឌអន្តរកាល ក្នុងសម័យអ៊ុនតាក់។
កាលពីថ្ងៃទី ២៥ ខែមេសា ឆ្នាំ ២០០៥ សាលាដំបូងរាជធានីភ្នំពេញបានសម្រេចកាត់ទោសកំបាំងមុខលោក សម រង្ស៊ី ឲ្យជាប់ពន្ធនាគារ រយៈពេលពីរឆ្នាំ និងបញ្ជាឲ្យគាត់បង់ប្រាក់សំណងជំងឺចិត្តជូនលោក ហោ ណាំហុង ចំនួន៨លានរៀល(ពីរពាន់ដុល្លារ)ចំពោះការបរិហារកេរ្តិ៍ និងញុះញង់ឲ្យមានការស្អប់ខ្ពើមលើមន្ត្រីរដ្ឋាភិបាល ព្រោះលោក សម រង្ស៊ី បានចោទលោក ហោ ណាំហុង ថាជាអតីតមេគុកបឹងត្របែកក្នុងរបបខ្មែរក្រហម។
លោក ជួង ជូងី មេធាវីការពារក្តីលោក សម រង្ស៊ី បានមានប្រសាសន៍កាលពីថ្ងៃម្សិលមិញថា លោកបានត្រៀមខ្លួនរួចរាល់ហើយ ដើម្បីការពារក្តីឲ្យកូនក្តីរបស់លោក និងថា លោកបានដាក់ពាក្យបណ្តឹងថ្មីទៅកាន់សាលាដំបូងរាជធានីជំទាស់ទៅ នឹងការសម្រេចខាងលើ ដោយអះអាងថា សាលាដំបូងរាជធានីមិនត្រូវសម្រេចករណីលោក សម រង្ស៊ី ឲ្យចាញ់លោក ហោ ណាំហុង ទេ ព្រោះលោក សម រង្ស៊ី បានឈ្នះក្តីលោក ហោ ណាំហុង ក្នុងករណីនេះនៅតុលាការកំពូលបារាំងរួចហើយ។
លោក ជួង ជូងី បានថ្លែងគូសបញ្ជាក់ថា៖ «គោលការណ៍ច្បាប់នៅលើពិភពលោក បើតុលាការកំពូលបារាំងសម្រេចឲ្យ ឯកឧត្តម សម រង្ស៊ី ឈ្នះ តើតុលាការខ្មែរសម្រេចឲ្យឯកឧត្តមចាញ់ក្តីយ៉ាងម៉េច?»។
លោក ការ សាវុត្ថ មេធាវីការពារក្តីលោក ហោ ណាំហុង បានបដិសេធមិនឆ្លើយតបលម្អិតទេកាលពីថ្ងៃម្សិលមិញ ប៉ុន្តែ បានថ្លែងថា លោកនឹងបង្ហាញខ្លួននៅតុលាការដើម្បីការពារកូនក្តីរបស់លោក៕ CR
0 comments:
Post a Comment