Home » Unlabelled » ជនជាតិថៃពីរនាក់នឹងអាចដោះលែងឆាប់ៗ?

Monday, September 26, 2011Print PDF

ជនជាតិថៃពីរនាក់នឹងអាចដោះលែងឆាប់ៗ?

អ្នកស្រីរ៉ាទ្រី អ្នកទោសថៃដែលកំពុងជាប់គុកនៅកម្ពុជា
©វណ្ណារ៉ា

ដោយ លាង ដឺលុច
កាសែតថៃនៅបន្តផ្សព្វផ្សាយអំពីលទ្ធភាពនៃការដោះលែងឆាប់ៗនូវ ទណ្ឌិតថៃ២នាក់ដែលតុលាការកម្ពុជាកាត់ទោសពីបទឆ្លងដែនខុសច្បាប់ និងបទចារកម្ម។ មន្ត្រីរដ្ឋាភិបាលកម្ពុជាវិញមិនបាននិយាយចំៗ ដូច្នេះទេ ប៉ុន្តែអះអាងដូចលោកនាយករដ្ឋមន្ត្រីហ៊ុន សែនថ្លែងប្រាប់សមភាគីថៃដែលថា កម្ពុជានឹងពិចារណារកវិធីដោះលែងទណ្ឌិតថៃទាំងពីរនោះតាមដំណាក់ កាល។
កាសែតថៃជាច្រើននៅបន្តនិយាយថាទណ្ឌិតថៃវេរ៉ា ស៊ុមខ្វាមឃីត និងនាងរ៉ាទ្រីនឹងត្រូវរួចផុតពីការជាប់ឃុំឃាំងនៅប្រទេសកម្ពុជាក្នុងពេលខាងមុខ។ ក្រៅពីមន្ត្រីរដ្ឋាភិបាលថៃ មេដឹកនាំចលនាអាវក្រហមដែលបានមកចូលរួមប្រកួតបាល់ទាត់ជាមួយអ្នកនយោបាយកម្ពុជាកាលពីចុងសប្តាហ៍កន្លងទៅនេះ ក៏បាននិយាយប្រាប់កាសែតថៃដូចគ្នាថា វេរ៉ា ស៊ុមខ្វាមឃីតនិងនាងរ៉ាទ្រីនឹងបានចាកចេញពីគុកព្រៃសក្នុងពេលឆាប់ៗនេះ។

ការស្វែងរកការដោះលែងវេរ៉ា ស៊ុមខ្វាមឃីត និងនាងរ៉ាទ្រី អ្នកទាំងពីរដែលជាសកម្មជនអាវលឿង គឺជារបៀបវាៈសំខាន់មួយនៅក្នុងដំណើរទស្សនកិច្ចរបស់នាយករដ្ឋមន្ត្រីថៃលោកស្រីយីងឡាក់ ស៊ីណាវ៉ាត់។ លោកស្រីយីងឡាក់ដែលអះអាងប្រាប់លោកនាយករដ្ឋមន្ត្រីហ៊ុន សែនថាទណ្ឌិតថៃទាំងពីរនាក់បានទទួលស្គាល់កំហុសរបស់ខ្លួនហើយនោះ បានស្នើអោយលោកនាយករដ្ឋន្ត្រីពិចារណារកលទ្ធភាពដោះលែងទណ្ឌិតថៃទាំងពីរពីមន្ទីរឃុំឃាំងនៅកម្ពុជា។ ក្រោយការលើកឡើងរបស់លោកស្រីយីងឡាក់ លោកនាយករដ្ឋមន្ត្រីហ៊ុន សែនបានឆ្លើយតបថា កម្ពុជានឹងពិចារណាអំពីករណីទណ្ឌិតថៃនេះទៅតាមនីតិវិធីច្បាប់របស់កម្ពុជាទៅតាមដំណាក់កាល។ នីតិវិធីច្បាប់មួយរបស់កម្ពុជា គឺការតម្រូវអោយទណ្ឌិតអនុវត្តទោសរបស់ខ្លួនអោយបាន២ភាគ៣សិន មុននឹងរដ្ឋាភិបាល តាមរយៈក្រសួងយុត្តិធម៌ស្នើសុំព្រះរាជលើកលែងទោសពីព្រះមហាក្សត្រ។

ក្នុងន័យនេះ ប្រសិនជាត្រូវជួយទណ្ឌិតថៃទាំងពីរនាក់មែននោះ អាជ្ញាធរកម្ពុជាអាចប្រើប្រាស់ពិធីបុណ្យជាតិធំៗដើម្បីបន្ធូរបន្ថយទោសដល់ទណ្ឌិតអោយដល់កម្រិតដែលអាចដោះលែងទណ្ឌិតទាំងពីរនាក់។ ឧទាហរណ៍ ក្នុងពិធីបុណ្យអ៊ុំទូកនៅពេលខាងមុខជាដើម។ លើសពីនេះទៀត គួរបញ្ជាក់ថា កម្ពុជានិងថៃក៏មានកិច្ចព្រមព្រៀងដោះដូរអ្នកទោសជាមួយគ្នាផងដែរ៕

0 comments:

Subscribe to: Post Comments (Atom)

សូមស្វាគមន៍មកកាន់គេហទំព័រ សម្លេងខ្មែរជាតិនិយម ។ សម្លេងខ្មែរជាតិនិយម និងផ្សព្វផ្សាយ នូវទស្សនៈនយោបាយពិតនៃសង្គម ដើម្បីជាកញ្ចក់សម្រាប់ប្រជាជាតិខ្មែរ យកទៅសិក្សា ស្វែងយល់អំពីបញ្ហាប្រទេសជាតិ ដែលដឹកនាំដោយជនផ្តាច់ការអាយ៉ងយួន ហ៊ុន សែន និងអាណានិគមយួនឈ្លានពាន ហើយរួបរួមគ្នាដើម្បីរំដោះ ជាតិ សាសនា ប្រជាជាតិខ្មែរ ឱ្យមាន សន្តិភាព ឯករាជ្យភាព និងប្រជាធិបតេយ្យពិតប្រាកដនៅក្នុងប្រទេសកម្ពុជា។

Home Khmer News Video World News Khmer Book Khmer Poems Sitemaps Login Website