អ្នកស្និទ្ធនឹងលោកជាស៊ីម ប្រធានគណបក្សប្រជាជន៤ រូបទៀត ត្រូវចាប់ឃុំខ្លួនបញ្ជូនទៅព្រៃស

Home » Unlabelled » អ្នកស្និទ្ធនឹងលោកជាស៊ីម ប្រធានគណបក្សប្រជាជន៤ រូបទៀត ត្រូវចាប់ឃុំខ្លួនបញ្ជូនទៅព្រៃស

Thursday, September 29, 2011Print PDF

អ្នកស្និទ្ធនឹងលោកជាស៊ីម ប្រធានគណបក្សប្រជាជន៤ រូបទៀត ត្រូវចាប់ឃុំខ្លួនបញ្ជូនទៅព្រៃស

អតីតទីប្រឹក្សានិងសមាជិកខុទ្ទកាល័យលោកជាស៊ីម ដែលត្រូវចាប់ខ្លួន

អតីតទីប្រឹក្សានិងសមាជិកខុទ្ទកាល័យលោកជាស៊ីម ដែលត្រូវចាប់ខ្លួន

RFI/PM

ដោយ លី ម៉េងហួរ
អតីតទីប្រឹក្សា ២រូប បុគ្គលិកខុទ្ទកាល័យម្នាក់ និងចុងក្រោយ ប្រធានពិធីការផ្ទាល់របស់ លោកជាស៊ីម ប្រធានគណបក្សប្រជាជនកម្ពុជានិងជាប្រធានព្រឹទ្ធសភា ត្រូវបានចាប់ខ្លួន បញ្ជូនទៅឃុំឃាំងនៅពន្ធនាគារព្រៃស ជាបន្តបន្ទាប់នៅថ្ងៃទី២៨កញ្ញាម្សិលមិញ។ អ្នកស្និទ្ធនឹងលោកជាស៊ីមទាំង៤រូប ត្រូវបានតុលាការចោទប្រកាន់ពីបទក្លែងឯកសារសាធារណៈ ប្រើប្រាស់ឯកសារក្លែងក្លាយនិងការផ្តល់ឯកសារដោយទុច្ចរិត។ កាលពីថ្ងៃទី១៣សីហា កន្លងទៅ អតីតឧត្តមសេនីយ៍ ឈឿន ចាន់ថន ហៅ ម៉ៅ មេបញ្ជាការកងអង្គរក្សលោកជាស៊ីម ក៏ត្រូវបានចាប់ខ្លួន និងចោទប្រកាន់ដូចគ្នានេះដែរ។

កាលពីថ្ងៃទី២៣កញ្ញា និងថ្ងៃទី២៥កញ្ញា ឆ្នាំ២០១១ កងអាវុធហត្ថបានចាប់ខ្លួនបុរស ៣ នាក់ ដែលជាអតីតទីប្រឹក្សា និងបុគ្គលិកខុទ្ទកាល័យលោកជាស៊ីម ពីបទក្លែងបន្លំឯកសារសាធារណៈ ប្រើប្រាស់ឯកសារក្លែងក្លាយ និងការផ្តល់ឯកសារដោយទុច្ចរិត។

ជនទាំងបីនាក់នោះ រួមមាន៖ ទី១-ឈ្មោះ ចាន់ កុសល អាយុ ៦០ ឆ្នាំ ជាអតីតទីប្រឹក្សាលោកជាស៊ីមនិងជាអតីតឧត្តមសេនីយ៍ឯក។ ទី២-ខៀវ បូរ៉ា អាយុ ៥០ ឆ្នាំ ជាជំនួយការមូលនិធិខ្មែរអភិវឌ្ឍន៍ និងជាបុគ្គលិកខុទ្ទកាល័យលោក ជាស៊ីម និងទី៣-ពន្លក ហូ អាយុ ៥៨ ឆ្នាំ ជាអតីតទីប្រឹក្សាលោកជាស៊ីម និងជាទីប្រឹក្សារបស់ក្រសួងមហាផ្ទៃ។

អ្នកស្និទ្ធនឹងលោកជាស៊ីមទាំងបីនាក់ ត្រូវបានតុលាការសម្រេចឃុំខ្លួននៅពន្ធនាគារព្រៃស កាលពីថ្ងៃទី២៧កញ្ញា ឆ្នាំ២០១១។
ចំណែកនៅថ្ងៃទី២៨កញ្ញាម្សិលមិញ លោកស្រី ផេង គន្ធាបូរី ប្រធានពិធីការផ្ទាល់លោកជាស៊ីម និងជានាយិកាប្រតិបត្តិមូលនិធិខ្មែរអភិវឌ្ឍន៍ ដែលមានលោកជាស៊ីម ជាប្រធានកិត្តិយស ក៏ត្រូវប៉េអឹមចាប់ខ្លួនពីខេត្តកោះកុង និងបញ្ជូនទៅតុលាការ ហើយត្រូវបញ្ជូនបន្តទៅឃុំឃាំងនៅពន្ធនាគារព្រៃស។

អ្នកនាំពាក្យកងរាជអាវុធហត្ថលើផ្ទៃប្រទេស លោក វរសេនីយ៍ឯក ខេង ទីតូ បានឲ្យដឹងថា លោកស្រី គន្ធាបូរី ជាបក្សពួករបស់អតីតឧត្តមសេនីយ៍ ដែលជាអតីតទីប្រឹក្សានិងបុគ្គលិកខុទ្ទកាល័យរបស់លោកជាស៊ីម ចំនួន ៣ នាក់ ដែលត្រូវបានប៉េអឹមចាប់ខ្លួនជាបន្តបន្ទាប់ កាលពីចុងសប្តាហ៍មុន។

ក៏ប៉ុន្តែនៅរសៀលថ្ងៃនេះ លោកមេធាវី គួយ ឃុនណា ដែលទទួលភារការពារក្តីឲ្យលោកស្រី ផេងគន្ធាបូរី បានលើកឡើងថា លោកស្រីប្រធានពិធីការលោកជាស៊ីម ជាជនស្លូតត្រង់ និងជាជនសុច្ចរិត ទៀងត្រង់។

តាមលោកមេធាវី លោកស្រី គន្ធាបូរី ជាជនរងគ្រោះ នៅក្នុងសំណុំរឿងដ៏រស៊ើបលើក្រុមអ្នកស្និទ្ធនឹងលោកជាស៊ីមពេលនេះ។

លោកមេធាវីស្នើឲ្យព្រះរាជអាជ្ញា មេត្តាពិចារណា និងតម្កល់រឿង មិនចាត់ការ ហើយសុំឲ្យដោះលែងលោកស្រី គន្ធាបូរី នៅក្រៅឃុំ។

សូមរម្លឹកថា កាលពីថ្ងៃទី១៣សីហា ឆ្នាំ២០១១ អតីតឧត្តមសេនីយ៍ឯក លោក ឈឿន ចាន់ថន ហៅ ម៉ៅ មេបញ្ជាការកងអង្គរក្សលោកជាស៊ីម ត្រូវបានប៉េអឹមចាប់ខ្លួន និងត្រូវតុលាការ សម្រេចឃុំខ្លួន ដោយចោទប្រកាន់ច្រើនបទល្មើស ដូចករណីអ្នកស្និទ្ធនឹងលោកជាស៊ីម ទាំង ៤ នាក់ខាងលើ។

នៅព្រឹកថ្ងៃទី២៩កញ្ញា ឆ្នាំ២០១១ លោក អ៊ុំ សារិទ្ធិ នាយខុទ្ទកាល័យលោកជាស៊ីម ប្រធានព្រឹទ្ធសភា និងជាប្រធានគណបក្សប្រជាជនកម្ពុជា កំពុងស្ថិតនៅប្រទេសចិន និងបានបដិសេធមិនធ្វើអត្ថាធិប្បាយ ចំពោះការចាប់ខ្លួនអ្នកស្និទ្ធនឹងលោកជាស៊ីម នៅពេលនេះឡើយ៕

0 comments:

Subscribe to: Post Comments (Atom)

សូមស្វាគមន៍មកកាន់គេហទំព័រ សម្លេងខ្មែរជាតិនិយម ។ សម្លេងខ្មែរជាតិនិយម និងផ្សព្វផ្សាយ នូវទស្សនៈនយោបាយពិតនៃសង្គម ដើម្បីជាកញ្ចក់សម្រាប់ប្រជាជាតិខ្មែរ យកទៅសិក្សា ស្វែងយល់អំពីបញ្ហាប្រទេសជាតិ ដែលដឹកនាំដោយជនផ្តាច់ការអាយ៉ងយួន ហ៊ុន សែន និងអាណានិគមយួនឈ្លានពាន ហើយរួបរួមគ្នាដើម្បីរំដោះ ជាតិ សាសនា ប្រជាជាតិខ្មែរ ឱ្យមាន សន្តិភាព ឯករាជ្យភាព និងប្រជាធិបតេយ្យពិតប្រាកដនៅក្នុងប្រទេសកម្ពុជា។

Home Khmer News Video World News Khmer Book Khmer Poems Sitemaps Login Website