Print 
PDFអំពើហិង្សាកាលពីយប់មិញនៅប្រទេសយេម៉ែន ដែលជារដ្ឋមួយក្នុងចំណោមរដ្ឋជាច្រើនក្នុងពិភពអារ៉ាប់ ជាទីដែលមេដឹកនាំជើងចាស់ប្រឈមមុខនឹងការបោះបោរពីសំណាក់ប្រជាជន ក៏អាចទទួលបានការចាប់អារម្មណ៍ផងដែរ បន្ទាប់ពីសហរដ្ឋអាមេរិក ដែលជាម្ចាស់ជំនួយដ៏សំខាន់របស់លោកប្រធានាធិបតី អាលី អាប់ដុលឡះ សាឡេះ បានបញ្ជាឲ្យបុគ្គលិកការទូតសំខាន់ទាំងអស់ ចាកចេញពីប្រទេសនេះដោយសារតែអំពើហិង្សាកាន់តែឡើងខ្ពស់។
ក្រុមមន្ត្រីមកពីប្រទេស G8 មានអាមេរិក កាណាដា អង់គ្លេស បារាំង អាល្លឺម៉ង់ អ៊ីតាលី ជប៉ុន និងរុស្ស៊ី បានរៀបចំកិច្ចប្រជុំត្រៀមខ្លួនមួយកាលពីថ្ងៃពុធម្សិលមិញ នៅឯទីក្រុងឌូវីល ដើម្បីឈានទៅដល់ជំហររួមមួយស្តីពីបញ្ហានានា ចាប់ពីសេដ្ឋកិច្ចពិភពលោក រហូតដល់សង្គ្រាមស៊ីវិលនៅលីប៊ី គោលដៅនុយក្លេអ៊ែរអ៊ីរ៉ង់ និងចលាចលនៅស៊ីរី។
រៀបចំដោយលោកប្រធានាធិបតីបារាំង នីកូឡាស់ ហ្សាកូហ្ស៊ី កិច្ចប្រជុំកំពូលនេះនឹងត្រូវធ្វើឡើងរហូតដល់ថ្ងៃសុក្រ។ ជំនួបកំពូលនេះត្រូវបានគេរំពឹងថានឹងឯកភាពលើកញ្ចប់ជំនួយតម្លៃ រាប់ពាន់លានដុល្លារសម្រាប់ប្រទេសទុយនីស៊ី និងអេហ្ស៊ីប បន្ទាប់មានចលាចលក្រោកឡើងបះបោររបស់ប្រជាជនប្រឆាំងនឹងមេដឹកនាំ ផ្តាច់ការរបស់ពួកគេ និងដើម្បីសម្រេចលើកិច្ចព្រមព្រៀងមួយសម្រាប់គាំទ្រដល់ប្រទេស ដទៃទៀតនៅក្នុងតំបន់នេះ ដែលចង់បានរបបប្រជាធិបតេយ្យ។
ទោះជាយ៉ាងណា បាតុកម្មប្រឆាំងនឹងសម្ព័ន្ធមិត្តលោកខាងលិចដទៃទៀត ជាពិសេសនៅក្នុងបណ្តាប្រទេសសម្បូរប្រេងក្នុងឈូងសមុទ្រពែក ហាក់មិនបានទទួលជំនួយច្បាស់លាស់នោះឡើយ។
លោកស្រីរដ្ឋមន្ត្រីការបរទេសអាមេរិក ហ៊ីលឡារី គ្លីនតុន និងលោករដ្ឋមន្ត្រីហិរញ្ញវត្ថុអាមេរិក ធីមូទី ហ្គីស្ន័រ បានសរសេរនៅក្នុងលិខិតមួយផ្ញើជូនប្រទេស G8 កាលពីថ្ងៃពុធម្សិលមិញថា៖ «យើងចែករំលែកផលប្រយោជន៍យ៉ាងពិតប្រាកដនៅក្នុងដំណាក់កាលផ្លាស់ ប្តូរនៅអេហ្ស៊ីប ហើយទុយនីស៊ី បានទទួលជោគជ័យ ហើយក្លាយទៅជាគំរូសម្រាប់តំបន់។ ថ្វីបើយ៉ាងនេះ យើងប្រឈមនឹងការបាត់បង់ឱកាសនេះមួយរំពេច»។
វិវាទស្ថាប័ន IMF
ក្រុមមេដឹកនាំ G8 ដែលបានធ្វើដំណើរមកដល់រមណីយដ្ឋានកាស៊ីណូ អាចត្រូវទប់ទល់នឹងការកាន់កាប់ថ្នាក់ដឹកនាំនៃស្ថាប័ន ហិរញ្ញវត្ថុដ៏សំខាន់មួយនេះរបស់អឺរ៉ុប។ វិវាទនេះបានកើតឡើងក្រោយពីលោក ដូមីនីក ស្ត្រូស-កាន់ បានចាកចេញពីតំណែងជាប្រមុខ IMF ដោយសារតែការចោទប្រកាន់ពីបទប៉ុនប៉ងរំលោភលើនារីបម្រើសណ្ឋាគារ ម្នាក់នៅបុរីញូវយ៉ក។
លោកស្រីរដ្ឋមន្ត្រីហិរញ្ញវត្ថុបារាំង គ្រីស្ទីន ឡាហ្កាដ បានប្រកាសថា លោកស្រីនឹងឈរឈ្មោះសម្រាប់តំណែងនេះ នៅឯកិច្ចប្រជុំកំពូល G8 បន្ទាប់ពីទទួលបានការគាំទ្រជាឯកច្ឆន្ទពីសហភាពអឺរ៉ុប ហើយក្រុមអ្នកការទូតនិយាយថា លោកស្រីបានទទួលការគាំទ្រពីអាមេរិក និងចិនទៀត។
ប្រេសិតរុស្ស៊ីប្រចាំប្រទេសបារាំង បានប្រាប់ Reuters ថា៖ «ខ្ញុំគិតថា នៅក្រៅកិច្ចប្រជុំ G8 ក្រុមមេដឹកនាំទាំងនោះនឹងពិភាក្សាគ្នាអំពីបញ្ហានេះ ទោះបីជាយ៉ាងណា លោកស្រី ឡាហ្កាដ នឹងអាចក្លាយជាបេក្ខជនដ៏ល្អបំផុត»។ លោកបន្ថែមថា លោកជឿជាក់ថា ប្រទេសរបស់លោកនឹងមិនជំទាស់នឹងលោកស្រីឡើយ។
លោកអគ្គរដ្ឋទូតរុស្ស៊ី អាឡិចសាន់ឌ័រ អូឡូវ បានបន្ថែមថា៖ «ប៉ុន្តែ បញ្ហាគឺថា តើអឺរ៉ុបខាងលិចគួរតែដឹកនាំនាំស្ថាប័ននេះរហូត ឬយ៉ាងណា ហើយហេតុអ្វីបានជាប្រទេសដទៃទៀតមិនអាចដឹកនាំបាន ជាពិសេសប្រទេសប្រេស៊ីល រុស្ស៊ី ឥណ្ឌា ចិន និងអាហ្វ្រិចខាងត្បូង ដែលគេក៏មានបេក្ខជនផ្ទាល់របស់គេដែរ?»៕ ប្រែសម្រួល ឌិត សុខធី
0 comments:
Post a Comment